Now Reading:
शिक्षकको हाजिरमा नगरपालिकाको निगरानी
Full Article 2 minutes read

शिक्षकको हाजिरमा नगरपालिकाको निगरानी

sikchhyak

असोज ४, खोटाङ । असोज १ गते सोमबार खोटाङको दिक्तेल रुपाकोट मझुवागढी नगरपालिकाको एक विद्यालयमा तीन शिक्षक अनुपस्थित देखिए। नगरपालिकाबाटै निगरानी हुनेगरी जडान गरिएको ई–हाजिरीका माध्यमबाट सो विद्यालयमा एकैसाथ तीन शिक्षक अनुपस्थित देखिएपछि मेयर दिपनारायण रिजालले तत्काल फोन गरेर शिक्षकको अनुपस्थितिका बारेमा सोधखोज गरे।

तर, विद्यालयका प्रअबाट कोही पनि शिक्षक बिदामा नबसेको जवाफ आयो। नामै उल्लेख गरेर तीन शिक्षक अनुपस्थित रहेको देखिएको बताइएपछि भने ‘साँच्चीकै शिक्षक विद्यालयमा नआएको’ पोल खुल्यो। विद्यालयमा शिक्षकको उपस्थिति लाई नियमित गर्नका लागि दिक्तेल रुपाकोट मझुवागढी नगरपालिकाले अनलाईनमार्फत शिक्षकको ई–हाजिरी ट्र्याकिङ सुरु गरेपछि विद्यालयमा शिक्षक आए,नआएको थाहा पाउन सहज भएको हो। सामुदायीक विद्यालयका शिक्षकको उपस्थितिलाई नियमित गर्दै शैक्षिक गुणस्तर उकास्नका लागि नगरपालिकाकाभित्रका १८ माविमा ई–हाजिरी लागू गरिएको हो।

असोज १ गतेदेखि नगरपालिकाले इन्टरनेटका माध्यमबाट दिक्तेलबजारस्थित नगर कार्यालयबाटै बसी–बसी १५ वडाका माबिमा कार्यरत शिक्षकको उपस्थितिलाई निगरानी गर्ने व्यवस्था मिलाइएको छ। ई–हाजिरी ट्र्याकिङले ‘कुन विद्यालयका शिक्षक कुन बेला उपस्थित भए, कुनबेला विद्यालयबाट निस्किए’ भन्ने बुझ्न सहज भएको मेयर रिजालले बताए। ‘विद्यालयको ई–हाजिरीलाई अनलाइनबाट मोनिटरिङ गरिन्छ, कुन शिक्षकले कुन समयमा हाजिर गरे भन्ने कुरा यहीबाट हेर्न सकिन्छ,’ मेयर रिजालले भने, ‘ई–हाजिरी ट्र्याकिङबाट निगरानी सुरु गरिएको थाहा भएपनि शिक्षकको उपस्थिति नियमित गर्न सहज भएको छ। ’विद्यालयमा हुने शिक्षकको ढिलो उपस्थितिका कारण पठन–पाठनमा पर्ने असर कम गर्नका लागि ई–हाजिरीको व्यवस्था मिलाइएको नगरपालिकाले जनाएको छ।

दिक्तेल रुपाकोट मझुवागढी नगरपालिकाका १८ माविमा हाल १८२ शिक्ष ,शिक्षीका कार्यरत छन्। गत सोमबार गरिएको ई–हाजिरी ट्र्याकिङमा नगरपालिकाका १६ शिक्षक विद्यालयमा १० बजेभन्दा ढिला उपस्थित भएकामा दोश्रो दिन मंगलबार ४ शिक्षक मात्र ढिलागरी उपस्थित भएको पाइएको थियो। यस्तै, बिहीबार एकजना शिक्षक ३३ मिनेट ढिलागरी विद्यालयमा उपस्थित भएको नगरपालिकाले जनाएको छ। नगरपालिकाले क्रमशः आधारभुत र प्रावि विद्यालयमा पनि अनलाइनमार्फत ई–हाजिरीको व्यवस्था मिलाउने तयारी गरिएको मेयर रिजालले बताउनु भयो। ‘ई–हाजिरीमार्फत गरिएको निगरानीले शिक्षकको उपस्थितिमा सुधार आएको छ,’ मेयर रिजालले भन्नु भयो ‘बिहीबार एक जना शिक्षक मात्र ढिलो उपस्थित हुनुभएको पाएका छौँ।’

Leave a Reply

Your email address will not be published. Required fields are marked *

Input your search keywords and press Enter.