निर्मला पन्तको सम्झनामा निर्माण हुने पार्कको शिलान्यास

महेन्द्रनगर, २३ माघ –बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको सम्झनामा निर्माण गर्न लागिएको बाल उद्यानको शिलान्यास भएको छ। बुधबार भीमदत्त नगरपालिका–२ का वडाध्यक्ष डम्बरसिंह कार्कीले उद्यानको (चिल्ड्रेन पार्क)को शिलान्यास गरे।

निर्मला पन्तले अध्ययन गरेको महुलियास्थित सरस्वती माध्यमिक विद्यालय परिसरमा उद्यान निर्माण हुने भएको हो। २०७६ भित्रमा निर्माण सम्पन्न गर्ने लक्ष्य राखिएको उद्यान दुई कठ्ठा क्षेत्रफलमा बन्न लागेको विद्यालयले जानकारी दिएको छ।

पार्कको शिलान्यास गर्दै वडाध्यक्ष कार्कीले १२ लाख ४३ हजार लागत अनुमान रहेको पार्कका लागि नगरपालिकाले चालु आर्थिक वर्षमा पाँच लाख रुपैयाँ बजेट विनियोजन गरेको बताए।

विद्यालयकै जग्गामा बन्ने उद्यानमा ४ ब्लक रहनेछन्। पार्कमा विभिन्न प्रजातिका फूल तथा वृक्ष र बालबालिकाका लागि पिङ, चिप्लेटी लगायतका मनोरञ्जनका सामग्री राखिने वडाध्यक्ष कार्कीले जानकारी दिए।

निर्मला पन्तकी आमा दुर्गादेवीले छोरीको सम्झनामा वडा कार्यालयले गर्न लागेको काम सराहनीय रहेको बताईन्। उनले निर्मलाको हत्या गरिएको ६ महिना बितिसक्दा पनि हत्यारा पत्ता नलागेकामा दुख व्यक्त गर्दै सरकारसँग न्यायको माग गरेकी छन्। शिलान्यास कार्यक्रममा शिक्षक, विद्यार्थी, मानव अधिकारकर्मीलगायत स्थानीयको उपस्थिति थियो ।