कुल लगानीमध्ये ५५.९ प्रतिशत ऊर्जामा : आर्थिक सर्वेक्षण

काठमाडौँ। नेपालमा लगानी प्रतिबद्धताको हिसाबमा सबैभन्दा बढी लगानी ऊर्जाक्षेत्रका उद्योगमा भएको पाइएको छ। संघीय संसदमा हिजो सोमबार सार्वजनिक गरिएको आर्थिक सर्वेक्षण २०७५/७६ अनुसार आर्थिक वर्ष (आव) २०७५/७६ को फागुन महिनासम्ममा ऊर्जामूलक उद्योगमा मात्र कुल लगानीमध्ये ५५ दशमलव ९ प्रतिशत अर्थात् रू. १० खर्ब २० अर्ब १५ करोड २० लाख लगानी भएको तथ्यांक छ। उक्त आर्थिक सर्वेक्षणअनुसार सबै उद्योगमा गरी कुल लगानी १८ खर्ब २३ अर्ब ७६ करोड ३० लाख भएको छ।

त्यसैगरी, दोस्रोमा उत्पादनमूलक उद्योग रहेको छ। उत्पादनमूलक उद्योगमा कुल लगानीको २३ दशमलव ८ प्रतिशत अर्थात् ४ खर्ब ३३ अर्ब ९० करोड ३० लाख रुपैयाँ लगानी भएको पाइएको छ। त्यस्तै तेस्रोमा परेको सेवामूलक उद्योगमा १ खर्ब ४९ अर्ब ८१ करोड रुपैयाँ लगानी भएको छ।

उक्त सर्वेक्षणअनुसार सबैभन्दा कम लगानी सूचना, प्रसारण तथा सञ्चार प्रविधिसम्बन्धी उद्योगमा भएको छ। यस उद्योगमा ० दशमलव ११ प्रतिशत अर्थात् २ अर्ब ३ करोड ७० लाख रुपैयाँ मात्र लगानी भएको छ।

त्यस्तै, पर्यटनसम्बन्धी उद्योगमा १ खर्ब ३६ अर्ब ४० करोड ५० लाख, निर्माणसम्बन्धी उद्योगमा ४९ अर्ब ९२ करोड २० लाख, कृषि तथा वनजन्य उद्योगमा २४ अर्ब ६४ करोड ९५ लाख, खनिजजन्य उद्योगमा ६ अर्ब ८८ करोड ४० लाख रुपैयाँ कुल लगानी भएको छ।

आर्थिक सर्वेक्षणअनुसार संख्याको हिसाबमा हेर्ने हो भने नेपालमा आव २०७५/७६ को फागुनसम्ममा उत्पादनमूलक उद्योग सबैभन्दा बढी अर्थात् २ हजार ९ सय ७६ वटा दर्ता भएको पाइएको छ। त्यसैगरी, दोस्रोमा सेवामूलक उद्योग रहेको छ। गत फागुनसम्ममा दर्ता भएका सेवामूलक उद्योगको संख्या २ हजार १ सय ६८ पुगेको छ। तेस्रोमा रहेको पर्यटन उद्योगको संख्या १ हजार ७ सय ५ वटा दर्ता भएको उक्त आर्थिक सर्वेक्षणमा उल्लेख छ।

दर्ता भएका अन्य उद्योगहरू कृषि तथा वनजन्य ४ सय ५६, ऊर्जामूलक ३ सय ५०, खनिजजन्य ६९, निर्माण ५८ र सूचना, प्रसारण तथा सञ्चारसम्बन्धी उद्योग ५० वटा रहेका छन्।

आर्थिक सर्वेक्षणअनुसार उल्लेखित सबै उद्योगमध्ये रोजगारीका हिसाबले सबैभन्दा बढी रोजगारी उत्पादनमूलक उद्योगले सृजना गर्ने अनुमान गरिएको छ। यस उद्योगले ३ लाख २० हजार व्यक्तिलाई रोजगारी दिने अनुमान गरिएको छ।

त्यसैगरी दोस्रोमा सेवामूलक उद्योग रहेको छ। यस उद्योगले १ लाख २३ हजार १ सय ३६ जना व्यक्तिका लागि रोजगारी सृजना गर्ने अनुमान गरिएको छ। त्यस्तै, तेस्रोमा परेको पर्यटन उद्योगले ६६ हजार ७ सय ७१ जनाका लागि रोजगारी सृजना गर्ने अनुमान गरिएको छ।

त्यस्तै, कृषि तथा वनजन्यमा ३५ हजार ३ सय २, ऊर्जामूलक उद्योगमा ३२ हजार ४ सय ८३, खनिजजन्य उद्योगमा ७ हजार २ सय ४, निर्माणसम्बन्धी उद्योगमा ३ हजार ८ सय १ र सूचना, प्रसारण तथा सञ्चार प्रविधिसम्बन्धी उद्योगमा २ हजार ४ सय १ जनाका लागि रोजगारी सृजना हुने अनुमान गरिएको छ।