पोखरा – सडक डिभिजन कार्यालय पोखराका प्रमुखसहित तीन जनालाई अख्तियार दुरुपयोग अनुसन्धान कार्यालय पोखराले घूस रकमसहित रंगेहात पक्राउ गरेको छ। उनीहरूलाई बिहीबार साँझ करिब ७ बजेको समयमा प्रमुखको क्वार्टरबाट ९ लाख रुपैयाँ घूससहित पक्राउ गरेको हो। डिभिजन सडक कार्यालय पोखराका प्रमुख हरिकुमार पोख्रेल, इन्जिनियर पवित्रमणि आचार्य र जीएमआर कम्पनीका ठेकेदार ऋषि गौतमलाई अख्तियारको टोलीले ९ लाख रकमसहित पक्राउ गरेको हो।

अख्तियार दुरुपयोग अनुसन्धान आयोगको पोखरा कार्यालयका प्रमुख काशीराज दाहालले सडक डिभिजन कार्यालय पोखराका प्रमुखसहितलाई पक्राउ गरिएको जानकारी दिए। विन्ध्यवासिनी हरिचोक बाटो निमार्णको ठेक्का पाएको जीएमआर कम्पनीका ठेकेदार ऋषि गौतम र इन्जिनियर पवित्रमणि आचार्य पैसा बोकेर प्रमुख हरि प्रसादको क्वार्टरमा गएको बेला अख्तियारको टोलीले डिभिजन सडकका प्रमुख पोखरेल र इन्जिनियर आचार्यलाई क्वार्टरबाट नियन्त्रणमा लिएको थियो। तर, अख्तियारको टोलीबाट फुत्केर भागेका ठेकेदार गौतमलाई कास्की प्रहरीको सहयोगमा उनकै कम्पनीको कार्यालयबाट पक्राउ गरिएको हो।

स्रोतका अनुसार सडक डिभिजन कार्यालय पोखराअन्तर्गत सडक निर्माणको ठेक्का मिलाइदिने भनी जीएमआर निर्माण सेवाका ठेकेदार ऋषि गौतमले बिहीबार साँझ डीई पाख्रेलको निवासमै पुगेर ९ लाख घूस रकम दिएर त्यहाँबाट फरार भएका थिए।

लोकप्रिय