काठमाडौँ, २१ माघ – उज्ज्वल घिमिरेद्धारा निर्देशित चलचित्र ‘लभ स्टेशन’ आगामी चैत २२ गतेदेखि प्रदर्शनमा आउने भएको छ। ‘लभ स्टेशन’ चैत २९ गते प्रदर्शनमा आउँने बताइएको थियो। तर चैत २९ गते चलचित्र ‘ए मेरो हजुर ३’को टिमले आफ्नो प्रदर्शन तय गरेपछि ‘लभ स्टेशन’काे प्रदर्शन मिति चैत २२ गते सारिएको निमार्ण पक्षले जानकारी दिएको छ।
उक्त चलचित्रको एउटा गीत ‘घाम जून नै चाहिँदैन’को छायाङ्कन भियतनाममा गरिएको छ। गीतमा नायक प्रदीप खड्का र नायिका जसिता गुरुङलाई देख्न सकिन्छ। यहाँ ‘किङकङ’, ‘एनाकोण्डा’जस्ता चर्चित हलिउड चलचित्र पनि खिचिएको थियो। यस गीतलाई प्रेम दिवसको दिन अर्थात् फागुन २ गते रिलिज गर्ने तयारी गरिएको छ।
काफिया फिल्मस्को व्यानरमा गोविन्द र कविर विक्रम शाहीले निर्माण गरेको चलचित्र लभस्टोरी कथामा बनेको छ। चलचित्रमा प्रदीप, जसिताका साथै रमेश बुढाथोकी, प्रकाश शाह, रेशु भट्टराई, बिनोदकुमार पौड्याल, प्रिया रिजाल लगायतका कलाकारको अभिनय रहेको छ।
चलचित्रमा शम्भुजित बाँस्कोटा, दीपक शर्मा, राजनराज शिवाकोटी र एलिसा कार्कीको सङ्गीत रहेको छ। यसको छायाङ्कन आलोक शुक्ला गरेका हुन्।
