काठमाडौं– महानगरीय प्रहरी आयुक्त (मेट्रो प्रहरी प्रमुख) प्रहरी नायव महानिरीक्षक (डिआइजी) विश्वराज पोखरेलले संठनमा माथिल्लो र तल्लो दर्जाका प्रहरी कर्मचारीबीच विभेद रहेको गुनासो बढ्दै गएका बेला माथिल्लो तहका प्रहरी अधिकृतहरुले पनि तल्लो तहका प्रहरी कर्मचारीको दैनिकीप्रति जानकार रहनुपर्ने निर्देशन जारी गरेका छन्।
उनले उच्च तहका प्रहरी अधिकृतहरुले हरेक दिन जवान तथा हवल्दारको मेसमा गएर खाना खानुपर्ने बताएका हुन्। त्यस्तै डिआइजी पोखरेलले माथिल्लो दर्जाका प्रहरी कर्मचारीहरुले साताको १ दिन भएपनि अनिवार्य रुपमा हवल्दार र प्रहरी जवानको ब्यारेकमा गएर सुत्नुपर्ने निर्देशन जारी गरेका छन्।
आइतबार महानगरीय प्रहरी परिसर ललितपुर तथा मातहतका प्रहरी कार्यालयको निरीक्षणमा निस्किएका डिआइजी पोखरेलले प्रहरी कर्मचारीले आफूलाई परेको समस्या संगठन भित्रैबाट खोज्नुपर्ने र संगठन भित्रका समस्याहरुलाई बाहिरी प्रचार प्रसार नगर्न पनि प्रहरी कर्मचारीलाई सचेत गराएका छन्।
डिआइजी पोखरेलले जनतालाई प्रवाह गर्ने सेवा निष्पक्ष, समान र सम्मानजनक हुनुपर्ने पनि बताए। प्रहरी कर्मचारीलाई परिणाममुखी भएर काम गर्न निर्देशन दिएका छन्। डिआइजी पोखरेलले उत्कृष्ट काम गर्ने कर्मचारीलाई पुरस्कृत गरिने बताउदै आफ्नो गलत स्वार्थ र गलत आचरणका कारण जानी जानी गल्ती गर्ने प्रहरी कर्मचारीलाई कुनै पनि हालतमा माफ गर्न नसकिने चेतावनी समेत दिए।
