काठमाडौँ, २२ माघ – नायिका दीपिका पादुकोण र नायक रणवीर कपुर बलिउडका चलचित्रमा उत्कृष्ट अभिनय गर्ने कलाकार हुन्। उनीहरूले ‘बच्ना ए हसिना’, ‘ए जवानी हे दिवानी’, ‘तमाशा’ लगायतका चलचित्रमा काम गरेका छन्। यी जोडीलाई चलचित्रको पर्दामा निकै रुचाइन्छ भने उनीहरूका चलचित्रले व्यावसायिक रूपमा पनि राम्रै सफलता पाएका छन्।
रणवीर र दीपिका पुनः एकसाथ काम गर्ने भएका छन्। ठूलो पदार्मा देखिएका उनीहरूले यसपटक भने एक ब्राण्डको विज्ञापनमा काम गर्नेछन्। यसको नाम भने खुलाइएको छैन। तर, ठूलो पर्दाका लागि पनि यी दुईले एकसाथ काम गर्ने खबर आएको छ। लभ रञ्जनको निर्देशनमा बन्ने एक चलचित्रमा दीपिका र रणवीरलाई देखिने भएको छ।
अजय देवगनको मूख्य भूमिका रहने यस चलचित्रको नाम भने बताइएको छैन। तर, सन् २०१९ भित्रै चलचित्र छायाङ्कन गरी डिसेम्बर २०२० मा रिलिज गर्ने भारतीय मिडियाहरूमा प्रकाशित भएको छ। यी जोडीलाई लिएर कुनै समय उनीहरूबीच प्रेमको चर्चा पनि चलेको थियो। तर, दीपिकाले रणवीर सिंहसँग विवाह गरेकी छन्। रणवीर कपुर भने नायिका आलिया भट्टसँगको सम्बन्धमा रहेका छन्।
