काठमाडौँ, २३ माघ– दिवाकर भट्टराई निर्देशित चलचित्र ‘क्याप्टेन’ आगामी फागुन १७ गतेबाट प्रदर्शनमा आउने तयारीमा छ। ललितपुरको एक पार्टी प्यालेसमा छायाङ्कन भइरहेको ‘कर्ली कर्ली’ बोलको गीतमा अनमोलसँग भुवन केसी र निरुता सिंहले एकसाथ नृत्य गरेका छन्।
उक्त गीतमा मेलिना राई र एसडी योगीको आवाज रहेको छ। गीतमा एसडीकै शब्द तथा संगीत रहेको छ। गीतको भिडियोलाई रेनशा वान्तवा राईले कोरियोग्राफी गरेकी छन्। गीतलाई उत्कृष्ट बनाउन कुनै कसर बाँकी नराखेको बताउँदै उनले भनिन्, ‘गीत निकै मिठो बनेको छ। दर्शकले केही नयाँ स्वाद पाउनुहुनेछ।’
अनमोल केसी र भुवन केसी पहिलो पटक एक साथ पर्दामा देखिन लागेका हुन्। पितासँग नृत्य गर्दा अनमोल भने केही नर्भस देखिन्थे। भुवन छोरातिर हेर्दै भन्छन, ‘मैले नाचेपछि अनमोल नर्भस देखिन थाल्यो।’
बाबु-छोराको जिस्क्याइमा रमाइरहेकी नायिका निरुता सिंह यो गीतमा नृत्य गर्दा बेग्लै आनन्द आइरहेको बताउँछिन्। निरुताले छायाङ्कन भइरहेको गीत नेपाली चलचित्रका दर्शकका लागि एउटा बेग्लै स्वाद हुने विश्वास व्यक्त गरिन्।
गीतको विषयमा भुवनले भने, ‘इशान नाम गरेको पात्रले खेल जितिसकेपछि सेलिव्रेसनको क्रममा यो गीत पर्दामा आउनेछ। दर्शकका लागि अनमोल, म र निरुताको जोडी बेग्लै स्वाद हुने विश्वास लिएको छु।’ नायक भुवन यस चलचित्रका निर्माता हुन्।
यो चलचित्रमा अनमोल केसीको साथमा उपासना सिंह ठकुरी, प्रियंका एमभी, सुनिल थापा, प्रशान्त ताम्राकार, विल्सन विक्रम राई मुख्य भूमिकामा छन्। भट्टराईको निर्देशनमा तयार भएको चलचित्रमा सुदिप बरालको छायाङकन रहेको छ। केही दिन चलचित्रको ट्रेलर सार्वजनिक भएको थियो, जसले अहिले युट्युबमा लाखौं भ्यूअर्स बटुलिरहेको छ ।
