कास्की – जैविक चिया अर्थात ग्रीन टी, स्वास्थ्यको लागि निकै लाभदायक मानिन्छ। जैविक चियामा भिटामिन ‘सी’, ‘इ’ र ‘बी टु’ पाइन्छ साथै ग्रीन टीमा फोलिक एसिड, बिटा व्यारोटिन, क्याल्सियम, फस्फोरस, म्याग्नेसियम, जिङ्क कपर, एन्टी अक्सिडेन्ट आदि तत्वहरू पाइन्छ।
त्यसैले यसको प्रयोगबाट शरीरमा स्फूर्तिका साथै स्मरण शक्तिको पनि विकास गर्दछ। पोखरामा आयोजित ‘टि–टक’ कार्यक्रममा वसन्त ट्रेडका सञ्चालक एवं अर्गानिक चिया व्यवसायी रवि पौडेलले जैविक चिया र ग्रीन टीको फाइदाको बारेमा जानकारी दिएका छन्।
यो कार्यक्रमको प्रमुख उद्देश्य नै जैविक चियाको महत्व र यसले मानव स्वास्थ्यमा पार्ने प्रभावबारेमा जानकारी दिने रहेको छ। ‘टि टक’ कार्यक्रममा जैविक चिया विज्ञ एवं कञ्चनजङ्घा अर्थोडक्स चिया उद्योगका सञ्चालक हरि सिटौलाले चियाको उत्पत्ति र यसको विकास क्रमसँगै मानव स्वास्थमा यसको महत्वबारे जानकारी दिएका थिए।
‘माइण्ड केमस्ट रिसर्च’ पर्सन सिटौलाले मानव मस्तिष्कमा जैविक चियाले उत्पन्न गराउने हर्मोन र त्यसले मस्तिष्कलाई कसरी सक्रिय र निष्क्रिय बनाउन भूमिका खेल्छ भन्नेबारेमा जानकारी दिए। कार्यक्रममा सहभागी ज्ञान गुरुङले सामान्य रुपमा बुझिने जैविक चियाका अनेक फाइदाबारे जानकारी लिन पाइएको बताए। उनले एउटै चियाको बोटबाट विविध खालका चिया कसरी तयार गर्ने त्यसको तयारी प्रक्रियाबारे जानकारी लिन सफल भएको बताए।
फिटनेस सञ्चालक कृष्णा गुरुङले स्वस्थ्य मन र शरीरका लागि जैविक चियाका अनगिन्ती गुणबारे जानकारी लिन सफल भएको बताए। उनका अनुसार कतीलाई अझै जैविक चियाको महत्वबारे ज्ञात छैन, देशभित्रको उत्पादनले अन्तरराष्ट्रिय बजार लिइसक्दा पनि यसको महत्वबारे नेपालील नै अज्ञात छन्।
उनले नेपालीमा अझै चिया पिउने परम्परागत संस्कृति भए पनि यसको वैज्ञानिक पद्धतिबारेमा जानकारी नभएको भन्दै यस्तो कार्यक्रमले जैविक चियाको महत्व उजागर गर्ने बताए। कार्यक्रम आयोजक पौडेलले सात वर्षदेखि जैविक र अर्धजैविक चियाको व्यवसाय गर्दै आएको र पछिल्लो समय नेपालीले जैविक चियाप्रति रुचि देखाएको बताए।
‘जुन अनुपातमा जैविक चियाको प्रयोग हुनुपर्ने हो, त्यो अझै भएको छैन।’ पौडेलले अहिले वसन्त चिया ट्रेड कन्सर्नमा चियाको मात्र ३० वटा जात उपलब्ध रहेको जानकारी दिए। ‘विभिन्न रोग लागेका व्यक्ति अहिले जैविक चिया प्रयोगबाट सञ्चो भएको भन्दै खोज्न आउने गरेका छन्’, उनले भने, ‘जैविक चियाको राम्रोसँग प्रयोग गर्न जानियो भने शरीरको ८० प्रतिशत रोग निको हुन्छ।’
