काठमाडाैं– आगामी सेप्टेम्बर २३–२५ मा काठमाडौं स्थित ठमेलमा ह्याकरहरुको सम्मेलन हुने भएको छ। दुई ओटा सम्मेलन सफलरुपमा सम्पन्न गरिसकेको थ्रेटकनको तेश्रो संस्करणको मिति भर्खरै तय भएको हो।
उक्त सम्मेलनमा सहभागिताका लागि जुलाई/अगस्टबाट नै टिकेट खुला गरिने आयोजक थ्रेटनिक्सका संस्थापक सचिन ठकुरीले जानकारी दिए। अहिले भने सम्मेलनमा प्रस्तुत हुने कार्यपत्र संकलन गर्ने कार्यमा जुटिरहेकाे र मूल्याङ्कन पश्चात त्यसको टुंगो लाग्ने संस्थापक ठकुरीले बताए।
सन् २०१८ को नोभेम्बर २१ देखि २३ मा पहिलो सम्मेलन आयोजना भएकाे थियाे। जसमा चार सयभन्दा बढीको सहभागिता रहेको थियो भने गत वर्षको सम्मेलनमा तीन सय हाराहारीको सहभागिता रहेको थियो। तर यस पटक भने थप भव्यताका साथ सम्मेलन आयोजना गर्ने र सम्मेलनमा सहभागिताका लागि अनलाइनबाटै आवेदन र त्यसको शूल्क तिर्ने व्यवस्था मिलाइने ठकुरीले जनाए।
