काठमाडौँ, २३ माघ – नेपाली चलचित्रका खलनायकका रूपमा चिनिएका अनुपविक्रम शाही अभिनित चलचित्र ‘पुरानो बुलेट’ले तीन अफिसियल पोस्टर लञ्च गर्दै प्रचार शुरु गरेको छ। उक्त पोस्टरमा अनुपसँगै अभिनेत्रीद्वय वर्षा शिवाकोटी र माला लिम्बूलाई फिचर गरिएको छ। चलचित्र चैत १ गतेबाट प्रदर्शनमा आउने तयारीमा छ।
सार्वजनिक पोस्टरमा पात्रहरूको चरित्र चित्रण राम्रोसँग गरिएको छ। पोस्टरमा अनुप लामो कपालमाथि रातो रुमाल बाँधेर जिन्स ज्याकेटमा देखिएका छन्। एक पोस्टरमा उनी बुलेटमा आफ्नै स्टाइलमा छन्। बर्षा गाउँले भेषमा प्रस्तुत हुँदा मालालाई केही बोल्ड देख्न सकिन्छ।
निर्देशक भीषण राई लामो समयको पत्रकारितापछि ‘एक्सन कट’मा होमिएका हुन्। उनकै डेब्यू निर्देशनमा तयार भएको यस चलचित्रको यही फेब्रुअरी २३ तारिखमा हङकङमा वल्र्ड प्रिमियर हुँदैछ।
चलचित्रमा अनुप, वर्षा र मालासँगै कविता आले, कृष्णभक्त महर्जन, शिरोमणि दवाडी, शिव मुखिया, दिवज राईलगायत कलाकारको लिड अभिनय रहेको छ।
चलचित्रको कथा तथा पटकथा लेखनमा निर्देशक भीषणलाई सन्तोष राईले सहयोग गरेका छन्। सन्तोष यो चलचित्रका कार्यकारी निर्मातासमेत हुन्। चलचित्र ‘पुरानो बुलेट’मा अशोककुमार राई (अशोक साम्पाङ), दीपेन्द्र लिम्बू, विरेन साम्बा र टीकाराम राई निर्माताका रूपमा रहेका छन्।
यस चलचित्रमा उत्तमजङ्ग लिम्बू, जयन जे वाइवा र भिजे घिमिरेको सङ्गीत समावेश छ भने छायाङ्कन हरि घले लामाको छ। अर्जुन जिसीको सम्पादन रहेको फिल्ममा प्रवीण सिंह र प्रशान्त तामाङको कोरियोग्राफी रहेको छ। फिल्ममा पूर्वी नेपालको टिपिकल कथाउतारिएको छ।
