म्याग्दी– म्याग्दीको अन्नपूर्ण गाउँपालिकाका अध्यक्ष डमबहादुर पुनले गाउँपालिकाको एक विद्यालयमा आफ्नो पारिश्रमिकबाट अक्षयकोष स्थापना गरेका छन्।
गाउँपालिका–४ स्थित नारच्याङमा रहेको नारच्याङ आधारभूत विद्यालयमा उनले पछि थप गर्ने गरी रु ५० हजारको अक्षयकोष स्थापना गरिदिएका हुन्। विद्यालयको ५८ औँ वार्षिकोत्सव तथा अभिभावक दिवसका अवसरमा हालै आयोजित कार्यक्रममा गरिब तथा विपन्न परिवारका विद्यार्थीलाई सघाउने उद्देश्यले अक्षयकोष स्थापना गरिएको बताइएकाे छ।
अध्यक्ष पुनले सरकारबाट पाउने सेवासुविधाबापतको रकम शैक्षिक क्षेत्रमा खर्च गर्ने गरेको जानकारी दिएका छन्। (रासस)
