(तस्वीर :खबरहब)
काठमाडौं– हाल पर्यटन विभागबाट सार्वजनिक भएको विज्ञप्ति सामाजिक सञ्जालमा भाइरल बनेको छ। राष्ट्रपति कार्यालयबाट सार्वजनिक भएको विज्ञप्तिमा रहेको गल्ती सेलाउन नपाउँदै पर्यटन विभागको विज्ञप्ति भाइरल बनेकको हो।
संस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले अन्नपूर्ण पदमार्गमा हिमपहिरोमा बेपत्ता भएका पदयात्री तथा पथप्रदर्शकका विषयमा गम्भीर ध्यानाकर्षण भएको विज्ञप्ति आइतबार जारी गरेको थियो। पर्यटन विभाग, पर्वतारोहण शाखाद्वारा जारी विज्ञप्तिमा उनीहरुको खोजीका लागि मन्त्रालय र विभागको सक्रियता रहेको जनाए पनि उसले जारी गरेका विज्ञप्तिको मिति नै गलत उल्लेख छ।
गत माघ ३ गते अन्नपूर्ण पदमार्गका क्रममा सो क्षेत्रमा हिम पहिरो गएको थियो। हिमपहिराेमा परेर सात जना वेत्तपा भएको र उनीहरु अझै सम्पर्कविहिन रहेको जनाए पनि विभागले जारी गरको मिति भने माघ १० गते देखि हराइरहेका भन्ने व्यहोरा छ। माघ १० गते आउन अझै चार दिन बाँकी हुनाले उक्त विज्ञप्ति सामाजिक सञ्जालमा भाइरल बनेको हो। विभागका कर्मचारीको कामलाई लिएर सामाजिक सञजालमा आलोचना भइरहेको छ।
यस अघि राष्ट्रपति कार्यालयले पनि माघ ३ गते शुक्रबार जारी गरेको विज्ञप्तिमा माघ १० गते जापानी प्रतिनिधिसँग राष्ट्रपति विद्यादेवी भण्डारीले शिष्टाचार भेटवार्ता गर्नुभएको भनेर उल्लेख गरेको थियो। उक्त विज्ञप्ति पनि सामाजिक सञ्जालमा निकै भाइरल बनेको थियो।
