एजेन्सी – चर्चित बलिउड नायिका कंगना रनावतले अर्की नायिका दीपिका पादुकोणलाई माफी माग्न आग्रह गरेकी छिन्। विशेषगरी, चलचित्र ‘छपाक’ को प्रमोशनका क्रममा दीपिकाले एसिड आक्रमणमा परेका महिलाहरुको संवेदनशीलतामा खेलेको भन्दै कंगनाले माफी माग्न भनेकी हुन्। दीपिकाले मेकअप आर्टिस्टलाई टिकटक भिडियो च्यालेञ्जमा आफ्ना ३ लुक्स फेरि बनाउन भनिरहेकी छिन्। जसमा, उनले ‘छपाक’ को लुक्स समेत उल्लेख गरेकी छिन्।
यो भिडियो सार्वजनिक भएपछि दीपिकाले दर्दनाक घटनामाथि रमाइलो गरेको भन्दै आलोचना भईरहेको छ। कंगना भन्छिन्, ‘मेरी बहिनी रंगोली पनि एसिड आक्रमणमा परेकी थिइन्। यो भिडियो सार्वजनिक भएपछि उनी मर्माहत बनिन्। कहिलेकाही मार्केटिङ टिम प्रमोशनका लागि चुक्छन्।
मलाई लाग्छ, दीपिकासँग यस्तो भिडियो बनाउनुको कारण पक्कै होला।’ उनले अगाडि भनेकी छिन्, ‘मेरी बहिनी जस्तै यो भिडियोबाट दुखी बनेका सबैसँग दीपिकाले माफी माग्न आवश्यक छ। यो कुनै मेकअप लुक्स होइन। यो लुक्स प्राप्त गर्ने कोशिस कसैले पनि गर्नु हुँदैन।’ यो विषयमा दीपिकाले के भन्छिन् भन्ने सबैको चासोको विषय बनेको छ।
