काठमाडौं– युवा पुस्ताका चर्चित नेपाली किक बक्सिङ खेलाडी अविरल घिमिरेले ‘च्याम्पियन मेडल’ प्राप्त गरेका छन्। जापानको टोकियोमा हालैसम्पन्न हिट ४६ किक बक्सिङ स्पर्धामा जापानी च्याम्पियन मुकेवासलाई पहिलो राउण्डमा नै पराजित गरी उनले सो उपाधि हात पारेका छन्।
काठमाडौँ चन्द्रागिरि नगरपालिका गर्जुधारामा स्थायी घर भएका २१ वर्षीय उनी हिट ४६ किक बक्सिङको टाइटल उपाधि जित्ने कान्छा बक्सर हुन्। उनी जापानमा ‘हिमालयन चितुवा’ को नामले परिचित भएका थिए। उनले पछिल्लो समय किक बक्सिङ स्पर्धामा निरन्तर आफ्नो पक्षमा जित हासिल गरेका छन्। उनले हाल सम्म १५ अन्तराष्ट्रिय स्पर्धामा विजयी भएको उनले बताएका छन्।
उनी नागोया शहरमा रहेर नेपालको तर्फबाट किक बक्सिङमा व्यावसायिक खेल खेल्दै आएका छन्। उनी पछिल्लो समय नेपाल भ्रमण वर्ष– २०२० को प्रचार अभियानमा समेत जुटेका छन्। बक्सर देव घिमिरेबाट अविरलले बक्सिङको विशेष प्रशिक्षण प्राप्त गरेका थिए। उपाधि हासिल गरेपछि अविरलले भने, ‘अगामी दिनमा अझ मैदानमा कडा रुपमा उत्रिन्छु। यो जित सबै नेपालीको हो।’ (रासस)
