काठमाडौँ, २४ माघ – नेपाली चलचित्र क्षेत्रमा नायक अनमोल केसी र प्रदीप खड्कालाई प्रतिस्पर्धीका रूपमा लिइने गरिन्छ। यी दुईले चलचित्रमा लगभग बराबरीकै संख्यामा काम गरिसकेका छन्।
प्रदीप र अनमोलको पहिलो भेट राजधानीमा आयोजित ‘एनएफडीसी अवार्ड’मा भएको थियो। उनीहरूले एकआपसमा अङ्कमाल गर्दै फोटो पनि खिचाए। भेटपछि उनीहरूबीच कुनै प्रतिस्पर्धा नरही राम्रो मित्रताको शुरुआत भएको मान्न थालिएको छ।
केही दिन अगाडि प्रदीपले अनमोलको मुख्य भूमिका रहेको चलचित्र ‘क्याप्टेन’को ट्रेलर आफ्नो फेसबूक पेजबाट शेयर गर्दै नयाँ मित्रताको शुरुआतको सङ्केत दिएका थिए। प्रदीपले ट्रेलर निकै मन परेको र आफूहरू दाजु–भाइसमेत रहेको बताएका थिए। उनको यो सकारात्मक सन्देशलाई दर्शकले प्रशंसा गरेका थिए।
त्यस्तै चलचित्र ‘क्याप्टेन’को ट्रेलर साझेदार गरेको ६ दिनपछि नायक अनमोलले प्रदीपलाई धन्यवाद दिएका छन्। प्रदीपको फेसबूकमा कमेन्ट गर्दै उनले लेखेका छन्, ‘धन्यवाद प्रदीप। ‘लभ स्टेशन’लाई शुभकामना।’ चलचित्र ‘लभ स्टेशन’ आगामी चैत २२ गतेबाट प्रदर्शनमा आउँदैछ भने चलचित्र ‘क्याप्टेन’को फागुन १७ बाट प्रदर्शन हुँदैछ।
यसरी अनमोल र प्रदीपबीचको सम्बन्धलाई लिएर उनीहरूका फ्यानहरूले प्रसंशासमेत गरेका छन्। साथै, चलचित्रमा यी दुवैलाई एकसाथ हेर्ने चाहना पनि दर्शकको रहेको छ।
