झापा– पूर्वी नाका काँकरभिट्टासंँग पश्चिम बङ्गालको पानीट्याङ्कीलाई जोड्ने मेची खोलाको पुल निर्माणसँगै पहुँचमार्गको काम शुरू भएको छ। पहुँचमार्ग करिब ५०० मिटरको हुने सडक डिभिजन कार्यालय दमकले जनाएको छ।
सडक विस्तार गर्ने काम भइरहेको सडक डिभिजन कार्यालय दमकका प्रमुख श्यामकुमार यादवले जानकारी दिएका छन्। सडक विस्तारका लागि राजमार्ग छेउछाउका सबै भौतिक संरचना हटाएर काम शुरु भएको मेची नगरपालिकाका प्रमुख विमलकुमार आचार्यले जानकारी दिएका छन्।
नेपालतर्फ नेपाल–भारत जोड्ने नयाँ मेची पुलको खम्बा र सडक बन्नुपर्ने स्थानमा बसोबास गरिरहेका ४३ स्थानीयवासीलाई सरकारले मुआब्जा वितरण गरेर स्थानीयवासीले जग्गा खाली गरिदिएपछि नेपालतर्फको भूभागमा पुल र पहुँच सडक निर्माणको कामले निरन्तरता पाएको छ। सडक विस्तार र पुल बनाउने काम भारतीय निर्माण कम्पनीले नै गरिरहेका छन्। रासस
