काठमाडौं– चलचित्र ‘नाई नभन्नु ल’ का फ्यानहरुको लागि खुरीको खबर छ। यो फिल्मको छैटौँ सिरिज बन्ने भएको छ। यसका निर्देशक तथा लेखक विकासराज आचार्यले अहिले चलचित्रको स्क्रिप्ट र संगीतमा काम भैरहेको बताएका छन्।
विकासले ‘नाई नभन्नु ल ५’ बनाएपछि ‘हजार जुनी सम्म’ नामक चलचित्र निर्माण गरेका थिए। तर, यो चलचित्र बक्स अफिसमा सफल रहन सकेन। यसपछि भने उनी, आफ्नै हिट सिरिजमा लागेका हुन्। वैशाखको दोश्रो साताबाट चलचित्रको छायांकन सुरु गर्ने उनले योजना गरेका छन्। चलचित्रमा नायक सलोन बस्नेत, बाल–कलाकार अनुभव रेग्मी र सेड्रिना शर्मा पक्का भैसकेको विकासले जानकारी दिए।
अन्य कलाकार भने चयन भएका छैनन्। यो चलचित्रमा ३ नायिका र एक नायक हुने बताइएको छ। विकासका अनुसार, ३ मध्ये एक नायिका भने नयाँ खोजिनेछ। नायक पनि नयाँ अनुहार नै राख्ने तयारी उनको छ। चलचित्र ‘नाई नभन्नु ल’ नेपाली चलचित्रको सिरिजको दुनियाँमा हिट मानिन्छ। यस फिल्मकाे सिरिजका गीतसंगीत र कथावस्तुलाई दर्शकले मन पराउँदै आएका छन्।
