एजेन्सी – मिस नेपाल युरोप २०२० को ताज निरुषा खत्रीले हात पारेकी छिन्। भिन्न देशका १२ जना प्रतिस्पर्धीलाई उछिन्दै फिनल्यान्ड निवासी खत्रीले उपाधि हात पारेकी हुन्। बेल्जियमको लुभेन सहरमा आयोजित कार्यक्रममा उनलाई मिस नेपाल २०१९ अनुष्का श्रेष्ठले ताज पहिर्याएकी थिइन्।
त्यस्तै कार्यक्रममा फस्ट रनरअपको उपाधि आयरल्यान्डकी संगीता थापाले जितिन् भने सेकेन्ड रनरअपको उपाधि बेल्जियमकी ज्योति भट्टले जितेकी छन्। आयोजक ड्रिम्स नेपालकी संस्थापक योगिता थापा र हिडेन ट्रेजरका अध्यक्ष दिवाकर राजकणिर्कारबीच भएको सम्झौताअनुसार मिस नेपाल, युरोपको उपाधि विजेता खत्रीले नेपालमा आयोजना हुने मिस नेपालको फाइनल राउन्डमा सोझै प्रवेश गर्न पाउने छिन्। ड्रिम्स नेपाल बेल्जियमकी अध्यक्ष योगिता थापाले पहिलो पटक आयोजना गरिएको मिस नेपाल युरोप भव्य रूपमा सम्पन्न हुँदा आफू अत्यन्त उत्साहित भएको बताइन्।
कार्यक्रममा युरोपका विभिन्न देशका प्रतिस्पर्धीले भाग लिएका थिए। गैरआवासीय नेपाली संघको महिला विभागसँगको सहकार्यमा युरोपमा गरिएको अडिसनबाट फिनल्यान्डकी निरुषा खत्री, फ्रान्सबाट अस्मिता ढकाल, श्रेया भण्डारी, सुष्मिता न्यौपाने, नर्वेबाट श्रद्धा थापा, अस्ट्रेलियाबाट स्नेहा मल्ल, सुशीला बोहरा, जर्मनीबाट समा पराजुली, आश्मा घिमिरे, बेल्जियमबाट ज्योति भट्ट, लुना श्रेष्ठ, सविना नेपाली, स्वीजरल्याण्डबाट रोजमेरी भाटिया, आयरल्यान्डबाट संगीता थापा छानिएका थिए।
