काठमाडौं — सफल बन्न आत्मविश्वास चाहिन्छ। आत्मविश्वासले मानिसलाई अगाडि बढ्न र नयाँ काम गर्न प्रेरणा दिन्छ। प्रायः सफल व्यक्तिका पछाडि आत्मविश्वासको ठूलो भूमिका हुन्छ। तसर्थ, कुनै काममा सफलता हासिल गर्न आफैँमाथि विश्वास हुन जरुरी छ।
आत्मविश्वासले मानिसमा जादुमय प्रभाव पार्न सक्छ। अध्ययनहरुका अनुसार आत्मविश्वास र सफलता तथा कार्यक्षमताबीच नजिकको सम्बन्ध छ। यसैकारणले पनि हामीले देख्ने गरेका सफल मानिसहरु आत्मविश्वासले भरिएका हुन्छन्। त्यसैले आफैँमा विश्वास जगाउन निम्न कुरा चाहिन्छ।
डर हटाउने — आत्मविश्वास बढाउनका लागि सबैभन्दा पहिला आफूभित्रको डरलाई हटाउन जरुरी हुन्छ। कुनै अन्य व्यक्तिले चाहँदैमा तपाईंको आत्मविश्वास बढ्दैन। जसका लागि आफ्नो क्षमताको पहिचान गर्नुपर्छ।
निरन्तर मिहिनेत — कोही पनि मानिस स्वतः उचाइमा पुगेका हुँदैनन्। जुनसुकै क्षेत्रका पनि हरेक सफल व्यक्ति आत्मविश्वासी हुनुमा निरन्तर मिहिनेत हुन्छ। निरन्तर मिहिनेत गर्दा स्वतः आत्मविश्वास बढ्छ।
सकारात्मक सोच — नकारात्मक भावनाले हुन लागेको कामलाई समेत बाधा र्पुयाउँछ। ससाना अवरोध आउँदा पनि रिस उठ्ने भएमा त्यो सफलताका लागि झनै बाधक हुन्छ। सकारात्मक सोच नभएकासँग आफन्त, सहकर्मी र साथीभाइसमेत बिस्तारै टाढिन्छन्। तसर्थ, जुनसुकै कामको सफलताका लागि पनि सकारात्मक सोचको विकास गर्न जरुरी छ।
पर्याप्त ज्ञान — विश्व, देश र समाजका सम्पूर्ण गतिविधिको जानकारी लिएर आफ्नो ज्ञानको भण्डार बढाउन आवश्यक छ। यदि, तपाईंसँग पर्याप्त ज्ञान छ भने कुनै ठाउँमा पनि पछि हट्नुपर्ने अवस्था आउँदैन। त्यसका लागि दैनिक नयाँ कुरा सिक्ने, पुस्तक पढ्ने गर्नुपर्छ।
डाइट र फिटनेस — फिटनेस, सन्तुलित आहारजस्ता कुराले आत्मविश्वासमा भूमिका खेलेका हुन्छन्। आत्मविश्वास बढाउन फिटनेस आवश्यक छ। त्यसका लागि खानपानमा पनि ध्यान दिन जरुरी हुन्छ।
व्यक्तित्व विकास — मानिसको पहिलो दृष्टि तपाईंको बाहिरी आवरणमा पर्छ। तसर्थ, आत्मविश्वास बढाउन लवाइखवाइमा पनि ध्यान र्पुयाउन जरुरी छ। नसुहाउने ड्रेसअपमा हिँड्दा अरूलाई मात्र नभएर कतिपय अवस्थामा आफैँलाई पनि असहज महसुस भइरहेको हुन्छ। सफा र स्विटेबल ड्रेसअपले तपाईंको व्यक्तित्व झल्काउँछ।
