सुर्खेत– कर्णाली प्रदेशका सामाजिक विकासमन्त्री दल रावलले नयाँ व्यवस्थाका लागि आफ्नो जीवन उत्सर्ग गर्ने शहीदहरुको सपना पूरा गर्नु आजको पुस्ताको अभिभारा भएको बताएका छन्।
नेपालको जहाँनिया राणा शासन व्यवस्था अन्त्य गरी मुलुकमा प्रजातन्त्र स्थापनार्थ विसं १९८७ मा जीवन बलिदान गर्ने चार महान् शहीद शुक्रराज जोशी, गङ्गालाल श्रेष्ठ, धर्मभक्त माथेमा र दशरथचन्द्र ठाकुरको योगदानको स्मरण गर्दै उनले शहीदले बगाएको रगतलाई कसैले कुल्चन नहुने बताए।
“एक दलीय, पञ्चायती बहुदलीय शासन व्यवस्था परिवर्तनका साथै जनयुद्ध, जनआन्दोलन, मधेश तथा कर्णाली आन्दोलन क्रममा जनताको मुक्तिका लागि लड्ने सबैको सपना पूरा गर्नु सरकारको मुख्य दायित्व हो,” उनले भने, “शहीदले देखाएको बाटोमा हामी सबै लाग्नुपर्दछ।”
कर्णाली प्रदेशका भूमि व्यवस्था, कृषि तथा सहकारीमन्त्री बिमला केसी, उद्योग, पर्यटन, वन तथा वातावरणमन्त्री नन्दसिंह बुढा, मुख्यमन्त्रीका प्रेस सल्लाहकार भीमप्रकाश शर्मा र प्रमुख सचिव केवलप्रसाद भण्डारीले शहीदको सपना पूरा हुन सकेमात्र उनीहरुको सम्मान हुने बताए।
