गोरखा– गोरखाको छेपेटारमा टिपरले ठक्कर दिँदा एक जना महिलाको मृत्यु भएको छ। महिलाको मृत्यु भएपछि सो क्षेत्र तनावग्रस्त बनेको छ।
दूध बिक्रीका लागि बजार हिँडिरहेकी महिलालाई गोरखा नगरपालिका १० स्थित गोरखकाली क्रसर परिसरमा ग १ ख ८०२७ नम्बरको टिपरले ठक्कर दिँदा उनको मृत्यु भएको हो।
मृत्यु हुनेमा गोरखा नगरपालिका १० अमलापानीका ५२ वर्षीया मनमाया तामाङ रहेका छन्। क्रसरबाट निस्केको टिपरले उनलाई किच्दा घटनास्थलमै मृत्यु भएको डिएसपी वासुदेव खतिवडाले जानकारी दिए।
तामाङको मृत्यु भएपछि आक्रोशित बनेका स्थानीयले क्रसरभित्र रहेका २० वटा टिपर र ६ वटा स्काभेटर तोडफोड गरेका हुन्। महिलालाई ठक्कर दिने टिपर र चालकलाई प्रहरीले नियन्त्रणमा राखेको छ। घटनाबारे अनुसन्धान भइरहेको डिएपी खतिवडाले जनाए।
