एजेन्सी– नायक अक्षय कुमार र नायिका सारा अली खानले आनन्द एल राईको निर्देशनमा बन्न लागेको चलचित्र ‘अत्रङ्गी रे’ मा एकसाथ काम गर्ने भएका छन्। यससँगै उनीहरु एकसाथ पर्दामा देखिने पक्का भएको छ।
चलचित्रमा धनुषको पनि मुख्य भूमिका पाईनेछ। यतिबेला सामाजिक संजालमा यो बिषय गर्मिलो बनेको छ। अक्षय र साराका पिता सैफ अली खानले केही चलचित्रमा सँगैकाम गरेका थिए। अब, अक्षय उनै सैफकी छोरी सारासँग देखिने भएका हुन्।
अहिले साराले बलिउडमा आफ्नो गज्जबको क्रेज बनाएकी छिन्। ‘केदारनाथ’ बाट डेब्यु गरेकी उनको पहिलो चलचित्र र दोश्रो चलचित्र ‘सिम्बा’ दुबै सफल भएको थियो।
अहिले उनी अभिनित चलचित्र ‘लभ आजकल’ रिलिजको तयारीमा छ। सारा अक्षयसँग काम गर्न पाउँदा निकै खुसी छिन्। अक्षयसँग सहकार्य गर्न पाउनु आफ्नाे लागि सौभाग्यको कुरा भएकाे सारा बताउछिन्। सारासँग काम गर्नपाउँदा अक्षय कुमार पनि उत्साहित छन्। ‘सारा अहिले निकै राम्रो सम्भावना भएकी नायिका हुन’, उनले भने।
नयाँ पुस्ताका कलाकारहरुसँग काम गरेर नयाँ कुराहरु सिक्ने अक्षयले बताएका छन्। दुई पुस्ताका कलाकारलाई एकसाथ पर्दामा देख्न पाउने कुराले दर्शकमा खुसी मिलेको छ। ‘अत्रङ्गी रे’ लाई भुषण कुमार र आनन्द एल राईले संयुक्त रुपमा निर्माण गर्न लागेका हुन्। चलचित्र हिमांशु शर्माले लेखेका हुन् भने यसकाे छायांकन मार्च १ बाट सुरु हुने बताइएको छ।
