एजेन्सी– टी–२० क्रिकेट सिरीजको चौथो खेलमा भारतसँग न्युजिल्याण्ड पराजित भएको छ। बिहीबार भएको सिरीजको चौथो खेलमा भारतले न्युजिल्याण्डलाई सुपर ओभरमा पराजित गरेको हो।
भारतले दिएको १ सय ६६ रनको लक्ष्य पछ्याएको न्युजिल्याण्डले निर्धारित २० ओभरमा ७ विकेट गुमाउँदै १ सय ६५ रन बनाएसँगै खेल सुपर होभरमा धकेलिएको थियो। न्युजिल्याण्डको लागि कोलिन मुन्रोले ६४ रनको योगदान दिए। त्यस्तै टिम सेइफर्टले ५७ रन बनाउँदा रोस टेलरले २४ रन जोडे। भारतको बलिङमा शार्दुल ठाकुरले २ विकेट लिँदा जसप्रित बुमराह र युजभेन्द्र चाहलले समान एक-एक विकेट लिए।
त्यसअघि पहिले ब्याटिङ गरेको भारतले निर्धारित २० ओभरमा ८ विकेट गुमाउँदै १ सय ६५ रन बनाएको थियो। उसको लागि मनिष पाण्डेले ५० रन बनाए भने केएल राहुलले ३९ रनको योगदान दिए। त्यस्तै शार्दुल ठाकुरले २० रन जोडेका थिए। न्युजिल्याण्डको बलिङमा इश शोधिले ३ तथा हमिश बेन्नेतले २ विकेट लिए।
सुपर ओभरमा न्युजिल्याण्डले भारतलाई १४ रनको लक्ष्य दिएको थियो। सुपर ओभरमा भारतको लागि ब्याटिङ गर्न आएका केएल राहुले एक चौका र एक छक्का तथा कप्तान विराट कोहलीले २ रन र एक चौका प्रहार गर्दै जित पक्का गरेका हुन्।
सिरीजको तेस्रो खेलमा पनि न्युजिल्याण्ड भारतसँग सुपर ओभरमा पराजित भएको थियो। जितसँगै ५ खेलको सिरीजमा भारत ४–० ले अगाडि बढेको छ। अर्को खेल जितेमा भारतले सिरीजमा क्लिन स्विप गर्नेछ।
