काठमाडौं– शहिद स्मारक ‘ए’ डिभिजन लिग फुटबलअन्तर्गको दशौं राउन्डको पहिलो दिन शनिबार दुई खेल हुँदैछ। शनिबारको पहिलो खेलमा रुस्लान थ्री स्टार क्लबले र सरस्वती युथ क्लबको सामना गर्दैछ।
उक्त खेल त्रिपुरेश्वरस्थित दशरथ रंगशालामा मध्यान्ह १२ बजे शुरु हुनेछ। रेलिगेशन जोनमा रहेको सरस्वती थ्री स्टारलाई हराउँदै रेलिगेशन जोन छोड्न चाहन्छ। उता थ्री स्टार पनि सरस्वतीलाई हराउँदै शीर्ष ६ को यात्रा सहज बनाउने दाउमा हुनेछ। पाँचौ स्थानमा रहेको थ्री स्टारको १४ अंक छ।
शनिबारको दोस्रो खेलमा मछिन्द्र क्लब र विभागीय नेपाल एपिएफ क्लबबीच प्रतिस्पर्धा हुँदैछ। ३ बजे दशरथ रंगशालामा हुने खेलमा दुबै टोली एकअर्काविरुद्ध जित निकाल्ने दाउमा हुनेछन्।
मछिन्द्रलाई एपिएफलाई पराजित गर्दै शीर्षस्थानमा उक्लने अवसर रहेको छ। त्यस्तै रेलिगेसन जोन छोड्न एपिएफले मछिन्द्रविरुद्धको खेल जित्नैपर्ने हुन्छ। लिगमा १९ अंक जोडेको मछिन्द्र दोस्रो स्थानमा छ।
