काठमाडाैं– नेपालस्थित चिनियाँ दूतावासले शनिबार प्रेस विज्ञप्ति जारी गर्दै चीनले कोरोना भाइरस प्रभावित क्षेत्रमा रहेका नेपालीहरुको जीवन रक्षा र स्वास्थ्य उपचारको ग्यारेन्टी गरिएको जनाएकाे छ। नेपालीहरूकाे बारेमा चीन सरकार गम्भिर रहेकाे भन्दै चीनले आश्वस्त रहन आग्रह गरेको हाे।
‘विद्यार्थीहरुसहित केही नेपालीहरु अझै पनि वुहानमा छन् । उनीहरुको जीवन तथा स्वास्थ्य उपचारको ग्यारेन्टी गरिएको छ,’ विज्ञप्तिमा उल्लेख गरिएकाे छ। चीनकाे हुपेई प्रान्तको वुहानबाट महामारीका रूपमा फैलिएकाे काेराेना भाइरसबाट चीनमा २ सय ५९ जनाकाे ज्यान गइसकेकाे छ भने ११ हजारभन्दा बढी मानिसहरू संक्रमित भएका छन्।
भाइरस प्रभावित क्षेत्रमा अझै पनि नेपालीहरु रहेको र उनीहरुले छिटो उद्धार गरिदिन आग्रह गरिरहेको समाचार प्रकाशमा आएका बेला चिनियाँ दूतावासले विज्ञप्ति जारी गरी उनीहरुको रक्षाका लागि सक्रिय कदम चाल्ने बताएकाे हाे।
महामारी नियन्त्रणका लागि र विदेशीहरुसँग समन्वय गर्नका लागि आपतकालीन संयन्त्र स्थापना गरिएको जानकारी दिँदै दूतावासकाे विज्ञप्तीमा भनिएको छ, ‘हामी यस महामारी नियन्त्रणको लडाइँ जित्नेमा विश्वस्त र सक्षम छौं। चीन सरकारले अन्तर्राष्ट्रिय दायित्वको पालना निकै जिम्मेवारपूर्वक गर्नेछ।’
विज्ञप्तिमा लेखिएको छ, ‘कृपया विश्वस्त हुनुस् चीनले सबैको हितको रक्षाका लागि सक्रिय कदम उठाइरहने छ।’ नेपाली पक्षले कोरोना भाइरसको महामारी रोकथामका लागि विश्व स्वास्थ्य संगठन (डब्लुएचओ) सँग समन्वय गरेर चालेका कदमहरुको चीनले प्रशंसासमेत गरेको छ। यदि आवश्यक भएमा नेपाली पक्षले काठमाडौंस्थित चिनियाँ दूतावास वा चीनको विदेश मन्त्रालयसँग पनि यसबारेमा कुराकानी गर्न सक्ने दूतावासले जनाएको छ।
