काठमाडौं– कतार एयरवेज शहीद स्मारक ए डिभिजन लिग फुटबलमा थ्रीस्टारले सरस्वती युथ क्लबलाई ४–० गोलले पराजित गरेको छ। शनिबार भएको खेलमा संजोग राईको हृयाट्रिकमा थ्री स्टारले सरस्वतीविरूद्ध शानदार जित निकालेको हो।
पहिलो हाफ गोलरहित बराबरीमा सकिएको खेलको दोस्रो हाफमा थ्री स्टारले ४ गोल गरेको हो। खेलको ४८ औं मिनेटमा भारतीय खेलाडी लालराम्भराले गोल गर्दै थ्रीस्टारलाई अग्रता दिलाएका थिए। बाँकी तीन गोल संजोक राइले गरेका थिए।
संजोकले खेलको ५७ औं मिनेटमा गोल गर्दा थ्री स्टारले अग्रता दोब्बर बनाएको थियो। त्यस्तै उनले ६६ औं मिनेटमा व्यक्तिगत दोस्रो गोल र ७१ औं मिनेटमा तेस्रो गोल गर्दै ह्याट्रिक पुरा गरे।
यससँगै संजोग राई ए डिभिजन लिग २०७६ मा हृयाट्रिक गर्ने पहिलो खेलाडी बनेका छन्। जितपछि थ्रीस्टारले १० खेलबाट १७ अंक जोडेको छ।
