कास्की– माध्यमिक विद्यालयस्तरीय वक्तृत्वकला प्रतियोगिता (कास्की तारा) को उपाधि ममिता विकले जितेकी छिन्। अन्नपूर्ण गाउँपालिका–१० मा अवस्थित उमा माध्यमिक विद्यालयमा कक्षा ९ मा अध्यनरत उनले जिल्लाको पाँचवटै स्थानीय तहबाट छानिएर आएका प्रतियोगीलाई हराउँदै रु ३० हजार सहित उपाधि जितेकी हुन्।
सूर्यतारा क्लब पोखरा–२७ ले आयोजना गरेको शनिबार सम्पन्न सो प्रतियोगितामा ‘सुखी नेपाली, समृद्ध नेपाल निर्माणका आधार’ विषयक राखिएको थियो। त्यसैगरी अमरसिंह माध्यमिक विद्यालय पोखरा–१२ मा कक्षा १० मा अध्यनरत छात्रा अपेक्षा अधिकारी र गौरीशङ्कर मनिलाल मावि कक्षा १० मा अध्यनरत छात्रा दुर्गा ढुङ्गानाले क्रमशः दोस्रो र तृतीय स्थान हासिल गरे।
गत असोज ५ गतेदेखि शुरु भएको प्रतियोगिता अन्तर्गत स्थानीय तहमा सम्पन्न प्रतियोगिताबाट प्रथम, द्वितीय र तृतीय हुन सफल विद्यार्थीलाई कास्की तारामा सहभागी गराइएकोे क्लबका अध्यक्ष विष्णु पुनले जानकारी दिएका छन्।
प्रथम, द्वितीय र तृतीय हुन सफल विद्यार्थीलाई गण्डकी प्रदेशसभा सदस्य प्रभा कोइराला, रुपा गाउँपालिका अध्यक्ष नवराज ओझालगायतले पुरस्कार वितरण गरेको थियो। उनले सूर्यतारा क्लबले जस्तै सामाजिक सङ्घसंस्थाले सरकारसँग हातेमालो गर्दै अघि बढ्नुपर्नेमा जोड दिए। (रासस)
