काठमाडौं– चीनको वुहानबाट फैलिइएको कोरोना भाइरसको संक्रमण बढ्दै गएपछि नेपालले हुबेईमा रहेका नेपालीहरुको उद्धार गर्ने भएको छ। नेपालले चीनको हुबेई प्रान्तमा रहेका नेपालीहरुलाई स्वदेश फर्काउने तयारी गरेकाे हाे।
चीनमा रहेको नेपाली राजदूतावासले शनिबार सूचना प्रकाश गर्दै उद्धार गर्न लागिएको जानकारी दिएको हो। राजदूतावासले त्यसका लागि दूतावासको वेवसाइटमा राखिएको फर्म भर्न समेत हुबेईमा रहेका नेपालीलाई आग्रह गरेको छ।
दूतावासले नेपालीको उद्धारका लागि विमान चार्टर्ड गरिएको जनाएको छ। यसअघि संस्कृति, पर्यटन तथा नागरिक उड्डयन मन्त्री योगेश भट्टराईले हुबेईमा रहेका नेपालीलाई स्वदेश फर्काउन दुई वटा जहाज तयारी अवस्थामा राखेकाे बताएका थिए।
नेपाल फर्किन चाहने नेपालीहरुको फर्म बुझाएपछि त्यही अनुसार विमानको व्यवस्था गरिने जनाइएको छ। फर्म दूतावासले दिएको ठेगानामा स्थानीय समयअनुसार फेब्रुअरी २ तारिख ९ बजेभन्दा अघि पठाइसक्नु पर्ने सूचनामा जनाइएको छ।
हरेक पासपोर्ट भएका व्यक्तिले छुट्टै फर्म भर्नुपर्ने छ। त्योभन्दा पछि दिएमा फर्म स्वीकार्य नहुने दूतावासले जनाएको छ। नाबालिगको हकमा अभिभावकले फर्म भर्दिनुपर्नेछ। कुनै दुविधा भएमा दूतावासले फोनमा सम्पर्क गर्न आग्रह गरेको छ।
बेइजिङस्थित नेपाली दूतावासका उपप्रमुख सुशील लम्सालले बीबीसी नेपाली सेवालाई दिएको जानकारी अनुसार चीनका विभिन्न सहरहरूमा करिब ८ हजार नेपालीहरू रहेका छन्। कोरोनाभाइरस प्रभावित वुहानमा भने ७० देखि ८० को सङ्ख्यामा नेपाली नागरिकहरू रहेको लम्सालले बताएको बीबीसीले उल्लेख गरेको छ।
कोरोना भाइरसको संक्रमण बढ्दै गएपछि विभिन्न देशहरुले चीनमा रहेका आफ्ना नागिरकहरुको उद्धार गरिरहेका छन्। कोरोनाका कारण चीनमा ३ सय ४ जनाको मृत्यु भइसकेको छ भने ११ हजार ७ सय ९१ व्यक्तिमा कोरोना भाइरसको संक्रमण देखिएको छ।
