एजेन्सी – बलिउड अभिनेत्री सोनाक्षी सिन्हा ट्रोलको सिकार बनेकी छिन्। सोनाक्षीले मुम्बईको सडकमा बुलेट बाइक चलाएर ट्रोलरको सामाना गर्नु परेको हो। नायिका करीना कपूरको रेडियो शो ‘ह्वाट विमेन वान्ट’ मा सोनाक्षी बुलेट बाइक चलाउँदै पुगेकी थिइन्। सोनाक्षीले बाइक चलाएको भिडियो सामाजिक सञ्जालमा भाइरल भएको छ।
भिडियोमा सोनाक्षी दबंग स्टाइलमा देखिएकी छिन्। भिडियोमा सोनाक्षीले बाइक चलाउँदा उनका बडीगार्ड र मिडियाकर्मी पछिपछि भागिरहेका हुन्छन् भने उनकै कारण बाटोमा ट्राफिक जाम भएको देख्न सकिन्छ।
यो भिडियोलाई लिएर कतिपयले सोनाक्षीको प्रशंसा पनि गरेका छन् भने कतिले उनको भीआईपी शैलीको विरोध गरेका छन्। एक प्रयोगकर्ताले सोनाक्षीको तारिफ गर्दै कमेन्ट गरेका छन्, ‘सोनाक्षी तपाईंको बाइक राइडिङ स्किल तपाईंको अभिनयभन्दा बढी राम्रो छ।’ ‘यो के मजाक चलिरहेको छ?,’ अर्का एक प्रयोगकर्ताको कमेन्ट छ।
यसअघि पनि ट्रोलरको सामना गरिसकेकी सोनाक्षी पछिल्लो समय सलमान खानसँग फिल्म ‘दबंग ३’ मा देखिएकी थिइन्। फिल्ममा उनी सलमान खानको अपोजिटमा थिइन्।
