काठमाडौं – पत्रकार फूलमान वलको निर्देशन गरेको फिल्म ‘नीरफूल’को फस्ट लुक सार्वजनिक भएको छ। निर्माण युनिटले फिल्मको चारवटा पोस्टर फष्टलुकको रुपमा एकसाथ बाहिर ल्याएको हो।
उक्त फिलममा दयाहाङ राई, रेखा थापा, शान्ति वाइबा, बुद्धि तामाङ, पुष्कर गुरुङ, जिम्मे छ्योकी घिसिङ, राजन खतिवडा, सरोज अर्याल, सरिता गिरी, मानस राज लगायतको अभिनय रहेको छ। भूकम्पका कारण विछोडिएका एक परिवारको प्रेमकथा आधारित फिल्मको छायाँकन गणेश हिमाल क्षेत्रमा पर्ने रुबी भ्याली र काठमाडौंमा गरिएको हो।
पोस्टरमा रुबी भ्याली र काठमाडौंको लोकेसन स्थापित गरिएको छ। रुवी भ्याली समेटिएको पोस्टरमा परिवार र प्रेम देखाइएको छ, भने भुकम्पपछिको काठमाडौं समेटिएको पोस्टरमा चरित्रहरुको संघर्ष र विछोड देखाइएको छ। निर्देशक वलले धादिङ रुबी भ्यालीको एउटा परिवारमार्फत भुकम्पको बेलाको मानवीय संघर्ष र आम मनोविज्ञान पस्किन खोजेको बताए।
अहिलेसम्म बाहिर आउन नसकेको रुबी भ्याली क्षेत्रको भूगोल र संस्कृति फिल्ममा बोनसको रुपमा हुने उनको दावी छ।अभिनेत्री रेखा थापाको विशेष भूमिका रहेको फिल्म आउँदो फागुन ३० गतेबाट रिलिज हुँदैछ।
