एजेन्सी – साविक विजेता पेरिस सेन्ट जर्मेन (पीएसजी) ले यो सिजन पनि उपाधि यात्रालाई मजवुत बनाउन नान्टेसमाथि जित हात पारेको छ। पीएसजीले घरेलु टोली नान्टेसलाई २–१ ले पराजित गर्दै उपाधि यात्रालाई थप मजवुत बनाएको हो।
जितसँगै पीएसजीले फ्रेन्च लिग वानको शीर्षस्थानमा १५ अंकको अग्रता बनाएको छ। पीएसजीको २३ खेलबाट ५८ अंक पुगेको छ। एक खेल कम खेलेको दोस्रो स्थानको मार्सेलीको ४३ अंक छ। नान्टेस ३२ अंक जोडेर १०औं स्थानमा छ।
पीएसजीको जितमा मोउरो इकार्डी र थिलो केररले गोल गरे। घरेलु टोलीका मोसेस सिमोनले सान्त्वना गोल फर्काए। २९औं मिनेटमा इकार्डीको गोलबाट पीएसजीले खेलमा अग्रता बनाएको थियो। इकार्डीले एन्जल डि मारियाको पासमा गोल गर्न सफल भयो। ५७औं मिनेटमा एन्जल डि मारियाकै पासमा थिलो केररले गोल गर्दै पीएसजीको अग्रता दोब्बर पारे।
६८औं मिनेटमा मोसेस सिमोनले गोल गर्दै घरेलु टोलीलाई खेलमा फर्काउने संकेत दिएका थिए। तर, त्यसपछि थप गोल निस्कन नसक्दा पीएसजी २–१ ले विजयी हुन सफल भयो।
