काठमाडौं – स्वास्थ्यमैत्री खाद्य पदार्थमध्ये मेथी एक हो, यो नेपाली भान्सामा नियमित प्रयोग हुने मसला पनि हो। मेथीलाई आयुर्वेदमा बहुगुणी औषधिका रूपमा व्याख्या गरिएको छ। त्यसैले यसलाई बहुगुणी वनस्पति मानिन्छ। यसको साग, गेडा, पानी, तेल, धुलो, टुसा र चिया आदि जसरी पनि यसलाई बनाएर खान सकिन्छ।
यस्ता छन्, मेथीबाट बन्ने परिकारहरु
पनिरमा मेथीको साग मिसाएर तरकारी बनाउन सकिन्छ, मेथीको परौंठा बनाएर पनि खान सकिन्छ, मेथीको कलिलो मुन्टाको साग खान सकिन्छ। यो निकै मीठो हुन्छ, माछामा मेथीको साग मिसाएर गज्जबको तरकारी बनाउन सकिन्छ।
मेथीको दानालाई एक रात भिजाएर गजवको अचार पनि बनाउन सकिन्छ, मेथीको पत्तालाई सुकाएर तन्दुरी चिकेनमा मोलेर खाँदा स्वादिष्ट र वासनादार हुन्छ, मेथीको पत्ताको चिया, त्यस्तै मेथीको तेल यी, दुवै स्वस्थ्यका लागि राम्रो मानिन्छन्, तोरीको तेलमा मेथीको दाना झान्ने, अनि ताजा अचार र छोइलामा पुनः झानेर खाएमा स्वादमा फरकपन पाउँनुहुनेछ।
चाम्रे भात अर्थात् चास्नी चावल पकाउँदा पनि घिउमा मेथी फुराउनाले स्वादमा फरक ल्याउँछ, मेथीलाई एक रात भिजाएर टुसा उमार्ने। अनि तरकारी बनाएर खाएमा त्यो स्वादिष्ट हुन्छ, दाल–मेथी, आलु–मेथी र मेथी–पकौडाजस्ता अनेकौँ परिकार बनाएर खान सकिन्छ, मेथी भिजाएको पानी पनि नियमित पिएमा स्वस्थ्यलाई अनेकौं फाइदा गर्दछ।
