काठमाडौं– आइसीसी विश्वकप लिग २ अन्तगर्तको त्रिकोणात्मक सिरीजको आफ्नो दोस्रो खेलमा अमेरिकाविरुद्ध नेपाल विजयी भएको छ। टियु क्रिकेट मैदानमा शनिबार भएको खेलमा नेपालले अमेरिकालाई ३५ रनले हराएको हो।
नेपालले दिएको १ सय ९१ रनको विजयी लक्ष्य पछ्याएको अमेरिकाले ४४.१ ओभरमा अलआउट हुँदै १ सय ५५ रन बनायाे। अमेरिकाको लागि इयन होल्याण्डले सर्वाधिक ७५ रन बनाए। उनले १ सय ११ बलको सामना गर्दै ७ चौका प्रहार गरेका थिए। त्यस्तै क्यामेरोन स्टेभेन्सनले १९ रन बनाउँदा करिमा गोरेले १० रन बनाए।
नेपालको बलिङमा सुशन भारीले १० ओभरमा ४३ रन दिँदै ३ विकेट लिए भने करण केसीले ७.१ ओभरमा १५ रन दिँदै ४ विकेट लिए। स्पिनर सन्दीप लामिछानेले १० ओभरमा २७ रन खर्चिएर २ विकेट लिँदा कुशल मल्लले एक विकेट हात पारे।
त्यसअघि पहिले ब्याटिङ गरेको नेपालले ४९.२ ओभरमा अलआउट हुँदै १ सय ९० रन बनाएको थियो। नेपालको लागि विनोद भण्डारी र कुशल मल्लले अर्धशतक प्रहार गरेका थिए। भण्डारीले ५९ रनको योगदान दिँदा मल्लले कीर्तिमानी ५० रन बनाए।
अर्धशतकसँगै मल्ल एकदिवसीय क्रिकेटमा अर्धशतक प्रहार गर्ने विशवको सबैभन्दा कान्छो खेलाडी बनेका छन्। खराब शुरुवात गरेको नेपालका ओपनर सुबास खकुरेल ३ रनमा आउट भएका थिए भने कप्तान ज्ञानेन्द्र मल्ल ३९ बलमा २१ रन बनाउँदै पवेलियन फर्किए।
त्यस्तै तेस्रो विकेटको रुपमा भरपर्दा ब्याट्सम्यान दीपेन्द्र सिंह ऐरी डकआउट भए। त्यस्तै पारस खड्का १९ रनमा पवेलियन फर्किए भने आरिफ शेख २ रनमा आउट भए। करण केसी १२ रनमा क्याच आउट हुँदा सन्दीप लामिछाने डकआउट भए। सुशन भारीले ११ रन बनाउँदा अविनाश बोहराले ५ रन जोडे।
अमेरिकाको बलिङमा क्यामेरोन स्टेभेन्सनले ३, रस्टी थेरोन र सौरभ नेत्रभल्करले समान २–२ विकेट लिएका थिए। सिरीजमा याे नेपालकाे पहिलाे जित हाे। यसअघिकाे आफ्नाे पहिलाे खेलमा नेपाल ओमानसँग पराजित भएकाे थियाे।
