एजेन्सी– अष्ट्रेलियामा जारी बिग बास लिग(बीबीएल) टी–२० क्रिकेटको उपाधि सिड्नी सिक्सरले जितेको छ। शनिबार भएको फाइनल खेलमा सिड्नीले नेपाली लेग स्पिनर सन्दीप लामिछाने आबद्ध मेलबर्न स्टार्सलाई १९ रनले पराजित गरेको हो।
१२ ओभरमा सिड्नीले दिएको १ सय १७ रनको लक्ष्य पछ्याएको मेलबर्नले १२ ओभरमा ६ विकेट गुमाउँदै ९७ रनमात्र बनायो। उसको लागि निक लार्किनले ३८ रन, नाथन कल्टर निलले १९ रन बनाए। सिड्नीको बलिङमा नाथन लायोन र स्टिभ ओकिफिले समान २–२ विकेट लिए।
वर्षाको कारण १२ ओभरमा झारिएको खेलमा सिड्नीले पहिले ब्याटिङ गर्दै १२ ओभरमा ५ विकेट गुमाउँदै १ सय १६ रन बनाएको थियो। उसको लागि जोश फिलीपले ५२ रन बनाए भने जोर्दन शीखले २७ रनको योगदान दिए।
त्यस्तै स्टेभेन स्मिथले २१ रन बनाए। मेलबर्नको बलिङमा आदम जाम्पा, ग्लेन म्याक्सवेलले समान २–२ विकेट लिँदा ड्यानियल वोरालले एक विकेट लिएका थिए।
