सिन्धुली– यौन हिंसा, हत्या र मानिसहरू बेपत्ता पारेकोलगायतका विभिन्न आरोपहरू लागेका रामबहादुर बमजनलाई खोज्न नेपालका ७७ वटै जिल्लाका प्रहरीलाई सजग गराइ सकिएको अधिकारीहरूले बताएका छन्।
सर्लाही जिल्ला अदालतले उनीविरुद्ध परेका अभियोगबारे अनुसन्धान अघि बढाउन बमजनलाई पक्राउ गर्न अनुमति दिएपछि प्रहरीको टोली शुक्रवार उनको सिन्धुलीस्थित आश्रममा पुगेको थियो। त्यहाँ बमजन फेला नपरेपछि उनका शिष्यलाई प्रहरीले सोधपूछ गरेको उनका अनुयायीहरूले बताएका थिए।
सिन्धुलीका प्रमुख जिल्ला अधिकारी जनार्दन गौतमका अनुसार बमजन अझै आश्रम वरपरका वनमा रहेको आशङ्कामा प्रहरीले त्यस क्षेत्रमा उनको खोजी जारी राखेको छ।
गौतमले बीबीसी न्यूज नेपालीसँग भने, आश्रममा खोजतलास भयो तर भेटिएन। कतै जङ्गल वा झाडीमा लुकेका छन् कि भनेर खोजतलास भइराख्या छ। तर उनी अरू जिल्लामा पनि पुगेका हुन सक्छन्।
शुक्रवार बमजनसम्बद्ध बोधी धर्म श्रवण सङ्घका केन्द्रीय सदस्य छत्र घिसिङले बमजन आश्रममा नरहेको र उनी महाध्यानमा रहेको बीबीसी न्यूज नेपालीलाई बताएका थिए। उनले बमजन भौतिक, सांसारिक रूपमा देखिने आवासमा नरहेको बरु जङ्गलतिर कता रहेको बताएका थिए।
बाराको रतनपुरी गाउँनजिकैको वनबाट तपस्या सुरु गरेका बमजनले पछिल्लो दशकमा सिन्धुपाल्चोक, लमजुङ र सर्लाहीमा समेत आश्रम बनाएको प्रहरीको भनाइ छ।बीबीसी
