एजेन्सी– चलचित्र क्षेत्रको प्रतिष्ठित ओस्कार अवार्डअन्तर्गत उत्कृष्ट सह–अभिनेता र सह–अभिनेत्रीको अवार्ड ब्राड पिट र लाउरा डेनले हात पारेका छन्। ओस्कार अवार्ड वितरणको ९२ औं संस्करणअन्तर्गत पिट र डेनले अवार्ड जितेका हुन्।
‘वन्स अपअन अ टाइम इन हलिउड’ फिल्मको अभिनयलाई लिएर पिटलाई उत्कृष्ट सहअभिनेताको उपाधि दिइएको हो। बीबीसीका अनुसार, पिटसँगै टम हृयांक्स, सर एनथोनी हपकिन्स, अल प्याकिनोललगायत पनि नोमिनेसनमा परेका थिए।
त्यस्तै, सह–अभिनेत्रीको नोमिनेसनमा अमेरिकन कलाकार क्याथी बेट्स, स्कारलेट जोनसन, फ्लोरेन्स पग र मारगट रोवी परेका थिए। तर म्यारिज स्टोरीको भूमिकालाई लिएर नोमिनेसमा परेकी डेनले उपाधी जितेकी हुन्।
बेस्ट एडप्टेड स्क्रिनप्ले विधाको नोमिनेसनमा परेका ५ मध्ये जोजो रविट उत्कृष्ट घोषित भएका छन्। बेस्ट वरिजिनल स्क्रिनप्लेको अवार्ड भने वोन जोन हो र हान जिन वनले संयुक्त रूपमा जितेका छन्। साउथ कोरियन कमेडी फिल्म प्यारासाइटमा हो र वनद्वयले निभाएको भूमिकाका लागि यो अवार्ड प्रदान गरिएको हो।
त्यस्तै बेस्ट एनिमेटेड फिचर विधाको अवार्ड ‘टोय स्टोरी ४’, बेस्ट डकुमेन्टरी फिचर अमेरिकन फ्याक्ट्रीले जितेको छ। लस एन्जलसमा जारी समारोहबाट विभिन्न विधाको अवार्ड घोषणा भइरहेको छ। उत्कृष्ट अभिनेता र अभिनेत्रीको अवार्डको घोषणा बाँकी नै छ।
उत्कृष्ट अभिनेतातर्फको नोमिनेसनमा एन्टेनि ब्यान्डेरस, लिओनार्दो डिक्यापरियो, आदम ड्रिभर र जोनाथन प्राइस समेटिएका छन्। त्यस्तै अभिनेत्रीतर्फ पनि ५ नोमिनेसनमा परेका छन्।
