पाल्पा– पाल्पाको रामपुरमा गौशाला बनाउन रकम जुटाउने उद्देश्यले आगामी फागुन १२ गतेदेखि महायज्ञ हुने भएको छ। अव्यवस्थित गाईको संरक्षणका निम्ति गौशाला र धर्मशाला बनाउन फागुन २० गतेसम्म रामपुर नगरपालिका वडा नम्बर ६ तातोपानी धाम रामपुर पाल्पामा महायज्ञ चल्ने छ।
वडाध्यक्ष तथा महायज्ञ मूल आयोजक समितिका अध्यक्ष हुमनाथ न्यौपानेले नेपालको राष्ट्रिय जनावर गाईलाई हिन्दू धर्मालम्बीले लक्ष्मीको प्रतीकका रुपमा मानेर पूजा गर्दै आए पनि पछिल्लो समय हेयको दृष्टिले हेरिएकाले यसको संरक्षण गर्न र गौशाला निर्माणका लागि यज्ञ गर्न लागिएको जानकारी दिएका छन्।
महायज्ञ मूल आयोजक समितिका सचिव वासुदेव ढकालले गाईको संरक्षण गर्दै गाई पाल्ने शैलीको विकाससमेत गराउन खोजिएको जानकारी दिएका छन्। रासस
