काठमाडौं– मेकअप गर्दैमा अनुहार चम्कने होइन, मेकअपले त केवल अनुहारको दाग, धब्बा आदि ढाकछोप गर्ने मात्र हो, मेकअप भनेको त अस्थायी विधीका रुपमा अनुहारलाई आकर्षक देखाउने मात्र हो। यदी अनुहारलाई मेकअप बिना नै कसरी चम्किलो, मुलायम र ताजा देखाउने त ? यसका लागि केही प्राकृतिक विधी अपनाउन सकिन्छ।
अनुहारमा चमक ल्याउनका लागि सम्पूर्ण शरीर नै तन्दुरुस्त हुनुपर्छ। यसका लागि पहिलो सर्त हो अनुशासित दिनचर्या। अर्थात सुत्ने, उठ्ने, खाने, शौच गर्ने नियमित तालिका, पोषिलो आहार, सक्रिय दिनचर्या, सकारात्मक सोंच चिन्तन। ताजा फलफूल, सागसब्जी, जुस आदिको सेवन गर्नुपर्छ।
तारेको, भुटेको खानेकुराले स्वास्थ्य खराब गर्छ। स्वास्थ्य खराब भए अनुहारमा चकम आउँदैन। यसैगरी व्यायाम, योग एवं ध्यान जस्ता विधीले पनि अनुहारको सौन्दर्यमा प्रभाव पार्छ। पाचन यन्त्र चुस्त हुनुपर्छ। शारीरिक रुपमा सक्रिय, तन्दुरुस्त एवं स्वस्थ्य व्यक्तिको अनुहारमा चमक हुन्छ।
त्यसैले अनुहारमा मेकअप गर्नुभन्दा पनि शारीरिक स्वास्थ्यमा ख्याल गर्नु उचित हुन्छ। यसबाहेक पनि अनुहारको सरसफाईमा ध्यान दिनुपर्छ। अनुहारको मृत कोशिका निकाल्नुहोस्। यो विधी हप्तामा एक पटक मात्र अपनाउनुपर्छ। अनुहार रगड्नाले मृत कोशिका निस्कन्छ र ताजगी आउँछ।
यस्तो फेसवास छनौट गर्नुहोस, जसमा छालाको मृत कोशिका हटाउने तत्व हुन्छ। धेरैको बानी हुन्छ, हातले अनुहार छोइरहने, यसले छालाको गुणवत्तामा धेरै असर गर्छ। हातको माध्यामबाट अनुहारमा ब्याक्टेरिया फैलन्छ। त्यसैले अनुहारमा हात लाने, घाउ कोट्याउने जस्ता बानीमा नियन्त्रण गर्नुहोस्।
