काठमाडौँ, २८ माघ – गत वर्ष प्रदर्शनमा आएको चलचित्र ‘कृ’ पछि नायक अनमोल केसीका कुनै चलचित्र आएका छैनन्। अब यस वर्षको फागुन १७ गतेबाट उनी अभिनित चलचित्र ‘क्याप्टेन’को प्रदर्शन हुने भएको छ। अहिले उनी यस चलचित्रको प्रचारमा व्यस्त छन्।
अहिलेसम्म चलचित्रकोे कुनै पनि महोत्सव स्टेजमा नपुगेका उनी यस चलचित्र प्रचारका लागि नेपालगञ्जमा जारी ‘खजुरा महोत्सव’मा सहभागी भएका छन्। आइतबार उनलाई हेर्नका लागि करिब २४ हजार बढी दर्शक महोत्सवमा उर्लिएका थिए। दर्शकको चर्को मागपछि आयोजकले नायक अनमोललाई महोत्सवमा महँगो पारिश्रमिकमा निम्त्याएको थियो। उनलाई उक्त महोत्सव निकै फाइदाजनक बनेको छ। एकतिर उनले महँगो पारिश्रमिक पाए भने अर्कोतिर चलचित्रको प्रचार पनि गरे।
चैत २९ गतेबाट प्रदर्शनमा आउन लागेको चलचित्र ‘ए मेरो हजुर ३’को आइतबार सार्वजनिक भएको टिजरले युट्युबमा राम्रो भ्यूअर्स बटुलिरहेको छ। यसैबीच ‘खजुरा महोत्सव’को स्टेज चढेका अनमोललाई हजारौँ दर्शकले ताली र हुटिङले स्वागत गरेका थिए। साँझको करिब ५ बजे स्टेज चढेका उनले पटक–पटक ‘क्याप्टेन’को रिलिज डेट दर्शकलाई स्मरण गराइरहे। उनले स्टेजमै ‘क्याप्टेन’को ‘रहर छ सँगै’ बोलको गीतमा गाउँदै डान्सका केही स्टेप देखाएका थिए भने चलचित्रको केही डाइलग पनि सुनाए। उनी पहिलो पटक नेपालगञ्ज पुगेका थिए। उक्त महोत्सवमा आज (सोमबार) अभिनेता भुवन केसी र अभिनेत्री निरुता सिंहको पनि प्रस्तुति रहनेछ।
