काठमाडौं, २९ माघ – फागुन १७ मा रिलिज हुने चलचित्र दी ब्रेकअपको प्रमोशनका लागि पुल्चोक इन्जिनियरिङ क्याम्पस पुगेका नायक आशिरमान देशराज जोशीलाई क्याम्पसबाट निस्कन हम्मेहम्मे पर्यो।
नेपाल तराई विद्यार्थी नवजागरण संघले आयोजना गरेको भव्य सरस्वती पूजाको अवसरमा टिम पुल्चोक क्याम्पस पुगेको थियो।
नायक आशिरमानसँगै अर्का अभिनेता रेमनदास श्रेष्ठ, नायिका इच्छा कार्की र चलचित्र निर्देशक हेमराज बिसी पनि क्याम्पस पुगेर विद्यार्थीहरुमाझ चलचित्रको बारेमा कुराकानी गरे र चलचित्र हेर्न अपिल गरे।
कार्यक्रममा प्रमोशन टिमसँगै पुगेको डान्स क्रुले चलचित्रको गीत आज हाम्रो भेट भाको दिन र हरपल बोलको गीतमा नृत्य गर्दा करिब १४ हजार विद्यार्थीहरु एकैसाथ झुमेका थिए।
केहीबेर स्टेजबाट बोलेर बाहिरिन खोज्दा आशिरमान, रेमनदास र इच्छालाई विद्यार्थीहरुले यसरी घेरे कि, उनीहरुलाई बाहिर निस्कन घण्टौँ लागेको थियो। इञ्जिनियरिङ विद्यार्थीहरुमाझ आशिरमानको लोभलाग्दो क्रेज देखिएको थियो।
कार्यक्रममा विभिन्न प्रस्तुतिहरु दिएका ५० विद्यार्थीलाई दी ब्रेकअपको पहिलो शो देखाइने कार्यकारी निर्माता थमनकुमार भण्डारीले बताएका छन्।
