काठमाडौं– सरकारले विदेशमा नेपाल भ्रमण वर्ष २०२० को प्रवर्द्धनात्मक प्रचार स्थगित गर्ने निर्णय लिएको छ। चीनकको वुहान शहरबाट सुरु भएको कोरोना (कोभिड १९) भाइरसको संक्रमण युरोपसम्म पुगेपछि सरकारले यस्तो निर्णय लिएको हो।
संस्कृति, पर्यटन तथा नागरिक उड्ययनमन्त्री योगेश भट्टराईले केही समयका लागि भ्रमण वर्षको प्रचार स्थगित गरिएको बताए। शनिबार आयोजित बौद्ध चामुण्डा हेरिटेज वाक कार्यक्रमलाई सम्बोधन गर्दै पर्यटनमन्त्री भट्टराईले भने, ‘जब परिस्थिति अनुकुल हुन्छ, सन्त्रासहरु हट्दै जान्छन्, त्यसपछि हामी सक्रियताका साथ भ्रमण वर्षको प्रवर्द्धनात्मक कार्यक्रम गर्नेछौं।’
अब देशभित्रकै पर्यटन प्रवर्द्धन जोड दिने उनको भनाई छ। कोरोना भाइरसको कारण भ्रमण वर्षमा २० लाख पर्यटक भित्र्याउने लक्ष्य असफल हुने सम्भावना रहेको पनि उनले बताए।
