डोल्पा– अङ्ग्रेजी विषयमा कमजोर भएको भन्दै डोल्पाको मुड्केचुला गाउँपालिकाले बालविकास केन्द्रमा लगानी गरेको छ। गाउँपालिकाभित्रका १३ र समुदायबाट सञ्चालित एक बालविकास केन्द्रलाई अङ्ग्रेजी माध्यमबाट पढाउन पहल शुरु गरिएको हो।
गाउँपालिकाले सङ्घीय सरकारबाट दिँदै आएको रकमभन्दा केही रकम आफैँले उपलब्ध गराएर यहाँका बालविकास केन्द्रमा बालविकास कक्षामा सो माध्यमको पढाइ शुरु गर्न लागेको गाउँपालिकाका अध्यक्ष दत्तबहादुर शाहीले जानकारी दिएका छन्।
गाउँपालिकाले केन्द्रलाई सो माध्यमबाट पढाइ शुरु गर्न रङ्गीन पुस्तक छापेर ल्याएको शिक्षा शाखाका दलबहादुर बस्नेतले जानकारी दिएका छन्। सो पुस्तकमा अध्यापन गर्दा समस्या पर्नबाट जोगिन सबै केन्द्रमा पढाउन शिक्षकलाई सातदिने तालिमसमेत दिइएको छ।
यसरी आफैँले पाठ्यपुस्तक तयार गरेर सो माध्यमबाट पढाइ शुरु गर्ने डोल्पाको पहिलो स्थानीय तहमा मुड्केचुला पर्दछ। माध्यमिक शिक्षा परीक्षामा सहभागी विद्यार्थीलाई बिदाको समयमा थप शिक्षण गर्नका लागि गाउँपालिकाले बजेट छुट्याएर अध्यापन गर्दै आएको छ। रासस
