एजेन्सी– भारतको राजस्थानमा ट्रक र जीप ठोक्किँदा नविवाहित दम्पतीसहित ११ जनाको मृत्यु भएको छ। राजस्थानको जोधपुर अन्तर्गत बलोत्रा फलोडी राजमार्गमा ट्रेलर ट्रक र बोलेरो क्याम्पर एकापसमा ठोक्किँदा ६ महिलासहित ११ जनाको मृत्यु भएको हो।
मृत्यु हुनेमा भर्खरै विवाह गरेर रामदेओरा मन्दिर जाँदै गरेका एक जोडी पनि रहेको भारतीय संञ्चार दैनिक भाष्करले जनाएको छ। घटनामा मर्नेमा ४ पुरुष, ६ महिला र १ बालक रहेको तथा अन्य ३ जना घाइते भएको पनि जनाइएको छ।
घाइतेहरुको जोधपुरको स्थानीय अस्पतालमा उपचार भइरहेको छ। दुर्घटना पछि ट्रक र बोलेरोमा अड्किएका मृतकहरुको शव क्रेनको सहायताले निकालिएको थियो। घटनाको अनुसन्धान भइरहेको प्रहरीले जनाएको छ।
