एजेन्सी- फेसबुकको स्वामित्वमा रहेको विश्वकै सबैभन्दा लोकप्रिय च्याटिङ एप ह्वाट्सएपमा अब ग्रुप भिडियो वा आडियो कल गर्दा आठ जनासम्म सहभागी हुन पाउने भएको छ। एन्ड्रोइड र आईओएस दुबैमा उपलब्ध रहेको बेटा भर्सनमार्फत एउटै भिडियो वा आडियो कलमा अब आठ जनासम्म जोडिन सक्ने भएको हो।
ह्वाट्सएपको सो अपडेटबारे जानकारी WABetaInfo ले आफ्नो ट्वीटरमार्फत सार्वजनिक गरेको हो।
"ह्वाट्सएप ग्रुप कलमा सहभागीहरुको सीमा संख्या बढेर आठ पुगेको छ।" WABetaInfo ले ट्वीटमा लेखेकाे छ, "यो सुविधा आइओयस र एन्ड्रोयड बेटा भर्सनमा उपलब्ध रहेकाे छ।"
यस अघि ह्वाट्सएपको ग्रुप भिडियो वा आडियो कलिङमा चार जनासम्म मात्र जोडिन मिल्थ्यो। चार भन्दा धेरै सहभागी भई ग्रुप भिडियो कल वा आडियो कल गर्न अन्य विकल्पको खोजी गर्नु पर्ने बाध्यता थियो। तर अब भने एउटै भिडियो वा आडियो कलमा आठ जनासम्म जाडिन सक्ने हुदाँ यसले अझ बढी लोकप्रिता पाएको छ।
यस्तो नयाँ फिचर थप भएसँगै ह्वाट्सएपको अब जुम, गुगल मिट, हाउसपार्टी र डुओ जस्ता चर्चित भिडियो कन्फ्रेरेन्स प्लाटफर्महरुसँग प्रतिस्पर्धा हुने भएको छ।
यद्यपी यो सुविधा तत्कालका लागि भने एन्ड्रोइड बेटा भर्सन २.२०.१३२ र आईओएस बेटा भर्सन २.२०.५०.२५ मा मात्र उपलब्ध छ। अपडेट भर्सन नभएकोहरुले गुगल प्ले स्टाेरबाट डाउनलोड गर्न सक्नेछन्। तर परीक्षण पछि भने कम्पनीले यो फिचर सबै आईओएस र एन्ड्रोइड प्रयोगकर्ताका लागि उपलब्ध गराउने जनाएको छ।
स्मरण रहोस, एप्पलको फेसटाइम भिडियो कलिङ टुलमा एकै पटक ३२ जनासम्म सहभागि हुन सक्छन् भने फेसबुक म्यासेन्जरमा एउटै भिडियो कलमा ५० जनासम्म जोडिन सक्छन्।
