काठमाडाैं - लकडाउन बारे निर्णय लिन आईतबार अपराह्न्न २ बजे मन्त्रीपरिषदको बैठक बस्दैछ। प्रधानमन्त्री निवास बालुवाटारमा बस्ने बैठकले लकडाउनको निरन्तरता तथा लकडाउनको किसीमबारे निर्णय लिने मन्त्रीपरिषद स्रोतले बताएको छ।
यसअघि कोरोना भाइरस रोकथाम तथा नियन्त्रण सम्बन्धी उच्चस्तरीय समन्वय समितिको कार्यदलले शनिबार लकडाउन एकसाता लम्ब्याउन सरकारलाई सिफरिस गरेको थियाे। कोरोनाको जोखिम नदेखिएका ठाउँहरुमा लकडाउन खुकुलो बनाउनुपर्ने आवाज उठिरहेका बेला आइतबार बस्न लागेको मन्त्रीपरिषद बैठकमा यसबारे पनि छलफल हुने एक मन्त्रीले बताए।
कोरोना भाइरसको संक्रमण फैलिन नदिनका लागि सरकारले यसअघि तोकेको लकडाउनको अवधि भाेलि सोमबार बिहानबाट सकिँदै छ।
कोरोना भाइरस रोकथाम तथा नियन्त्रण सम्बन्धी उच्चस्तरीय समन्वय समितिले बैसाख १८ गते (अप्रिल ३० तारिख)सम्म स्थगित रहेकाे हवाई उडानहरुलाई १५ दिन लम्ब्याउँदै जेठ २ गते (मे १५ तारिख) सम्म बन्द गर्ने निर्णय शनिबार नै गरिसकेकाे छ।
