कोरोना भाइरस (कोभिड–१९) सङ्क्रमण रोकथाम तथा नियन्त्रणका लागि सरकारले लागू गरेको लकडाउन (बन्दाबन्दी) को अवधिमा म्याग्दीको एउटै गाउँमा ६ जना भूकम्पपीडितले घर निर्माण गरेका छन्। विसं २०७२ को महाभूकम्पबाट प्रभावित बेनी नगरपालिका–२ बगरफाँटका ६ जना व्यक्तिले लकडाउन समयको सदुपयोग गरी निजी घर निर्माण गरेका हुन्।
बेनी नगरपालिका–२ बगरफाँटका नरबहादुर कार्की, गोविन्दप्रसाद शर्मा, भीमबहादुर कार्की, धनबहादुर कार्की, धु्रवप्रसाद शर्मा र बेदप्रसाद उपाध्यायले जिल्ला आयोजना कार्यान्वय इकाइ पुनःनिर्माण प्राधिकरणको मापदण्डअनुसारका घर निर्माण गरेका हुन्। प्राधिकरण म्याग्दीका प्रमुख यज्ञप्रसाद रिजालका अनुसार म्याग्दी जिल्लामा पछिल्लो समय भूकम्प प्रभावितको निजी आवास निर्माणको कामले तीव्रता पाएको छ।
भूकम्पबाट प्रभावितमध्ये म्याग्दीमा ८८४ र छुट तथा पुनःसर्वेक्षणबाट १८० गरी कूल एक हजार ६४ जना लाभग्राही रहेका छन्। २०७२ सालको सर्वेक्षणबाट देखिएका ८८४ लाभग्राहीमध्ये हालसम्म ५१५ लाभग्राहीले घर निर्माण गरेर तेस्रो किस्ता रकम बुझिसकेका छन्। त्यसैगरी ५८४ जनाले दोस्रो र ८०१ जनाले पहिलो किस्ता लिएका छन्। छुट तथा पुनःसर्वेक्षणबाट देखिएका १८० भूकम्पपीडितमध्ये हालसम्म १४० जनाको सम्झौता भएर आएको र उनीहरुको आवास निर्माणको प्रक्रिया लकडाउन खुलेपछि शुरु हुने आयोजना प्रमुख रिजालले बताएका छन्। प्रमुख रिजालका अनुसार म्याग्दीमा हालसम्म निजी आवस पुनःनिर्माणको ६४ प्रतिशत प्रगति भएको छ।
घरबारविहीनलाई गाउँलेले बनाइदिए घर
त्यसैगरी म्याग्दीको रघुगङ्गा गाउँपालिका–२ भगवतीको खड्कामारेका घरबारविहीन श्रीप्रसाद खत्रीलाई लकडाउन समयको सदुपयोग गरी स्थानीयवासीले घर बनाइदिएका छन्। लकडाउनको सदुपयोग गर्दै आर्थिक अवस्था कमजोर भएकै कारण घरबारविहीन भएका खत्रीको परिवारलाई घर निर्माण गर्न खड्गमारेका स्थानीयवासी व्यस्त छन्। आफन्तले उपलब्ध गराएको जग्गामा तीनकोठे चिटिक्कको घर बनाउने अभियानको संयोजन गरेका खत्रीले स्थानीय सरकारदेखि आफन्त, साथीभाइलाई सहयोग जुटाइरहेको बताएका छन्।
“लकडाउनको समयमा एउटा राम्रो काम गर्ने अवसर पाएको छु, श्रमदानसमेत गरेर घरवारविहीनको घर बनाउँदैछौँ”, उनले भने। लकडाउनको फुर्सदमा कुनै काम गर्ने योजना बनाइरहेको अवस्थामा एउटा मानवीय र परोपकारी कार्यमा समय दिन पाएको उनको भनाइ छ। “केहीदिनमै घर ठडिन्छ, लकडाउनले सिर्जनात्मक काम गर्नेलाई असर गरेको छैन”, उनले भने।
श्रीप्रसादलाई घर बनाउन उनका आफन्तले जग्गा दिने, ब्लक खरिदमा समेत सघाइरहेका छन् भने गाउँपालिकाले २० थान जस्तापाता सहयोग गरेको छ। घर बनाउन अझै केही आर्थिक आवश्यकता रहेको खत्रीको भनाइ छ। चारजनाको परिवारलाई भान्सा कोठासहितको घर बनाउने अभियानमा स्थानीय युवाले समेत सघाइरहेका छन्। घर बनाउन करिब रु चार लाख खर्च हुने अनुमान गरिएको बताउँदै अभियानमा सहयोग गर्ने सम्पूर्णलाई संयोजक खत्रीले धन्यवाद दिएका छन्। (रासस)
