काठमाडौं– विभिन्न राजनीतिक दलका नेता र सरोकारवाला सङ्घसंस्थाले कास्कीमा जातीय भेदभाव तथा छुवाछूत गरेका आरोपमा पक्राउ परेकालाई संरक्षण गरेको भन्दै गण्डकी प्रदेशसभा सदस्य कृष्णबहादुर थापाको राजीनामा माग गरेका छन्।
नेपाल कम्युनिष्ट पार्टी नेकपाका नेता जीतु गौतम र गणेश विक, नेपाली काँग्रेसका नेता मीन विश्वकर्मा, संयुक्त दलित सङ्घर्ष समिति, नेपाल राष्ट्रिय दलित पत्रकार सङ्घ र दलित गैरसरकारी संस्था महासङ्घलगायत सङ्घसंस्थाले प्रेस विज्ञप्ति जारी गरी प्रदेशसभा सदस्य थापाले तत्काल राजीनामा दिनपर्ने माग गरेका हुन्।
पोखरा महानगरपालिका– १६, बाटुलेचौरमा गत चैत २६ गते मोहन सुनारका आफ्ना भाइ सम्मरबहादुरको मृत्यु भएपश्चात् काजकिरिया गर्न नजिकैको सामुदायिक भवन प्रयोगका निम्ति अनुमति माग्दा स्थानीयवासी देवबहादुर थापा, जनक थापालगायतलाई सुनारमाथि दलित भएकै कारण जातीय अपमान, गालीगलोज र धाकधम्की दिई जाती विभेद गरेको आरोप लागेको थियो।
पीडित सुनारले आफूमाथि जातीय भेदभाव तथा छुवाछूत भएकाले नेपालको संविधान र जातीय भेदभाव तथा छुवाछूत कसुर सजाय ऐन, २०६८ अनुसार जिल्ला प्रहरी कार्यालयमा मुद्दा दर्ता गराएका थिए। स्थानीय समाजसेवी, दलित अगुवाको ठूलो दबाबमा पाँच दिनपश्चात् पीडक भनिएका जनक, देवबहादुर र राम बिसी पक्राउ परेका छन्।
सो घटनालाई कानूनी दायरामा ल्याउन सहयोग गर्नको सट्टा प्रदेशसभा सदस्य थापाले उल्टै जातीय भेदभाव तथा छुवाछूत गर्नेलाई समर्थन गर्ने विज्ञप्ति जारी गरेको भन्दै दलित समुदायले आपत्ति जनाउँदै आएका छन्। काँग्रेस निकट नेपाल दलित सङ्घले आइतबार बेलुका प्रेस विज्ञप्ति जारी गरी प्रदेशसभा सदस्य थापालाई अभियुक्तसरह पक्राउ गरी कानूनी कारवाहीको दायरामा ल्याउनपर्ने माग गरेको छ। रासस
