रुकुमपूर्व– रुकुमपूर्वमा आजदेखि लकडाउनलाई थप कडा बनाइने भएको छ। नेपालका विभिन्न क्षेत्रमा कोरोना संक्रमित बढ्दै गएपछि जिल्लामा लकडाउनलाई थप कडाइका साथ कार्यान्वयन गर्न लागिएको हो। जिल्ला सुरक्षा समितिको बुधबारको बैठकले आजदेखि यही जेठ ५ गतेसम्मका लागि स्वास्थ्य सेवाबाहेक अन्य सबै पसल तोकिएको समयमा मात्र खोल्न पाइने निर्णय गरेको सहायक प्रमुख जिल्ला अधिकारी अञ्जु पोखरेलले बताएकी छन्।
सोअनुसार स्वास्थ्य सेवाबाहेक अन्य अत्यावश्यकीय पसल बिहान ६ देखि ९ बजेसम्म र साँझ ५ देखि ७ बजेसम्म मात्र खोल्न पाइने छ। गृह मन्त्रालयले नै एक जिल्लाबाट अर्को जिल्लामा आवतजावतमा रोक लगाइसकेपछि अत्यावश्यकीय अवस्थामा जिल्लाभित्रै सवारी साधन चलाउनुपर्ने भएमा अनिवार्य रुपमा जिल्ला प्रशासन कार्यालयबाट अनुमति लिनपर्ने छ।
क्वारेन्टाइनमा बसेकाको आरडिटी
जिल्लाका विभिन्न ठाउँमा निर्माण गरिएका क्वारेन्टाइनमा बसेका पाँच जनालाई घर पठाइएको छ । दुई सातासम्म क्वारेन्टाइनमा बस्दा उनीहरुमा कोरोनाको कुनै लक्षण नदेखिएपछि घर पठाइएको हो। सिस्ने गाउँपालिका वडा नम्बर ५ स्थित रुक्मिणी माविको क्वारेन्टाइनमा बसेका तीन र पुथाउत्तरगंगा गाउँपालिका हुकामको देउराली माविको क्वारेन्टाइनमा बसेका दुई जनालाई घर पठाइएको जिल्ला स्वास्थ्य कार्यालय रुकुमपूर्वका निमित्त कार्यालय प्रमुख यादवप्रसाद शर्माले बताएका छन् ।
रुक्मिणी क्वारेन्टाइनमा बसेका तीन जनाको आरडिटी विधिबाट कोरोना परीक्षण गरिएको हो । क्वारेन्टाइनमा बसेकाहरुको जिल्लामै पहिलो पटक आरडिटी गरिएको हो । त्यसैगरी एक कैदीको पनि आरडिटी गरिएको छ । आरडिटी गरिएका चारै जनाको रिपोर्ट नेगेटिभ आएको शर्माले बताएका छन्। देउराली क्वारेन्टाइनमा बसेका दुई जनालाई भने सामान्य स्वास्थ्य जाँचपछि घर पठाइएको छ ।
क्वारेन्टाइनमा दुई साता पूरा गरी घर फर्किएकाहरु देशका विभिन्न जिल्लाबाट आएका हुन् । जिल्लामा किट अभावकै कारण क्वारेन्टाइनमा बसेका सबैको आरडिटी हुन नसकेको स्वास्थ्य कार्यालयले जनाएको छ । आपत्कालीन अवस्थाका लागि भनेर राखिएका ३१ किटमध्येबाट ती चार जनाको आरडिटी गरिएको हो । पछिल्लो चरणका कोरोना संक्रमणको जोखिम बढ्दै जाँदा जिल्लामा किट अभावले थप समस्या भएको छ । रासस
