काठमाडौं– राष्ट्रियसभाका सांसदले कोरोना भाइरसको सङ्क्रमणबाट सुरक्षित रहनका लागि सङ्क्रमित व्यक्ति र अन्य बिरामीलाई फरकफरक तरिकाले व्यवस्थापन गर्न माग गरेका छन्। राष्ट्रियसभाको आजको शून्य समयमा बोल्दै नेपाल कम्युनिस्ट पार्टी–नेकपाका सांसद नन्दा चपाईँले कोरोना भाइरसका बिरामी र गर्भवती सुत्केरीको उपचार एकै ठाउँमा गरेको पाइएको हुँदा फरकफरक स्थानको व्यवस्था गर्न सरकारसँग माग गरेका छन्।
‘कतिपय अस्पतालमा कोरोना भाइरस सङ्क्रमित व्यक्तिको उपचार र गर्भवती तथा सुत्केरीको उपचार भएको देखियो’, सांसद चपाईले भने, ‘ती उपचार फरकफरक हुन जरुरी छ, जनतालाई सुविधाहोस् मुख्य कुरा यही नै हो।’ नेपाली काँग्रेस प्रकाश पन्थले सरकारले विदेशमा सङ्कटमा परेका नेपालीलाई नेपालमा ल्याउने व्यवस्था मिलाउनपर्ने सुझाव दिएका छन्।
उनले भने, ‘सबै नेपालीलाई विदेशबाट ल्याउनपर्छ भन्ने होइन, कामविहीन र समस्यामा परेका नेपालीलाई ल्याउनपर्छ, सरकार नेपाली नागरिकको अभिभावक हो।’ सांसद पन्थले क्यारेन्टाइन बनाउन समस्या परेको भन्ने कुरा आइरहेको उल्लेख गर्दै नेपालमा धेरै सुविधासम्पन्न होटललाई क्वारेन्टिन प्रयोग गर्नसमेत सुझाव दिएका छन्। नेकपाका मायाप्रसाद शर्माले कोरोना भाइरसको सङ्क्रमणका कारण विपद्मा परेका नागरिकको सुरक्षाका लागि सरकारले ध्यान दिनपर्ने सुझाव दिएका छन्। रासस
